Kattaqo‘rg‘onda qalbaki 300 dollarni muomalaga kiritmoqchi bo‘lgan shaxs ushlandi

Samarqand viloyati Kattaqo‘rg‘on shahrida qalbaki valyutani muomalaga kiritmoqchi bo‘lgan shaxs qo‘lga olindi. Bu haqda Bosh prokuratura “Daryo”ga ma’lum qildi.

Ma’lumotlarga ko‘ra, Bosh prokuratura huzuridagi Departamentning Kattaqo‘rg‘on shahar bo‘limi tomonidan olingan tezkor ma’lumotlarga asosan IIB xodimlari bilan hamkorlikda tezkor tadbir o‘tkazilgan. Tadbirda fuqaro U.Sh. o‘zining yonida bo‘lgan qalbaki 3000 AQSh dollaridan 300 AQSh dollarini “Kattaqo‘rg‘on dehqon bozori”da fuqaro Sh.O.ga milliy valyutaga almashtirish uchun bergan vaqtida ashyoviy dalil bilan ushlangan.

Shuningdek, U.Sh.ning yashash xonadoni ko‘zdan kechirilganda 50 va 100 kupyurali 17 400 AQSh dollari, 1 dona 5000 kupyurali Rossiya rubli, 1 dona 1000 kupyurali Peru pul birligi hamda Lenovo rusumli noutbuk  va NR rusumli rangli printer mavjudligi aniqlangan. Ashyoviy dalil sifatida olingan valyuta qimmatliklari o‘tkazilgan ekspertiza xulosasiga ko‘ra qalbaki ekanligi ko‘rsatilgan.

Mazkur holat yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) 3-qismi bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Surxondaryoda qalbaki 10 ming dollarni 104 million so‘mga sotgan shaxs ushlangani, Farg‘onada esa qalbaki 100 dollarni o‘tkazmoqchi bo‘lganlarga jinoyat ishi qo‘zg‘atilgani to‘g‘risida xabar berilgandi.