Qashqadaryo viloyatida 167 ming 300 nafar aholi ishlash uchun xorijiy davlatlarga chiqib ketgan. Bu haqda Qarshi shahridagi Jurnalistlar uyida viloyat Bandlik bosh boshqarmasi mas’ullari ishtirokidagi matbuot anjumanida ma’lum qilindi, deya xabar berdi “Daryo” muxbiri.
Ta’kidlanishicha, xorijda ishlovchi qashqadaryoliklarning 70 foizdan ortig‘i Rossiyada ishlaydi.
“Xorijga ishlashga ketgan 167 ming 300 nafar qashqadaryolikning 70 foizdan ko‘prog‘i Rossiyada ishlayotgan bo‘lsa, qolgani Qozog‘iston, Koreyada, 7 foizi esa Turkiya va Arabiston davlatlarida mehnat qilmoqda”, — deydi viloyat hokimining tashqi mehnat migratsiyasi masalalari bo‘yicha yordamchisi Alisher Rahmonov.
Alisher Rahmonovning ma’lumot berishicha, xorijga ketgan qashqadaryoliklarning 21 ming 700 nafardan ortig‘ini ayollar tashkil etadi.
Viloyat bandlik bosh boshqarmasi boshlig‘i Bekzod Qurbonovning qayd etishicha, viloyatdagi mavjud 3 million 318 ming nafar aholining 1 million 364 ming 500 nafari mehnatga layoqatli iqtisodiy aholi hisoblanadi.
“Viloyatda ishsiz fuqarolarimiz 154 ming 900 nafar bo‘lib, bu viloyat aholisining 11,4 foizini tashkil qiladi. Pandemiyadan avval bu ko‘rsatkich 9,1 foizni tashkil etgan bo‘lsa, pandemiya davrida 13,4 foizga yetdi. Pandemiya sabab viloyatimizda ham ishsizlar soni ortdi. Shu sabab ham pandemiya davrida ish o‘rnini yo‘qotgan mehnat migrantlari va ishsiz fuqarolarning 35 ming 600 nafari mavsumiy jamoat ishlarga jalb etildi”, — deydi boshqarma boshlig‘i.
Matbuot anjumanida aytilishicha, 2021-yilda viloyatdan 11 ming 600 nafar ishsiz fuqaro boshqarma yordami bilan xorijga ishga yuboriladi.
Izoh (0)