O‘zbekistondagi mahkumlar soni ma’lum qilindi

O‘zbekistonda bugungi kunda 22 mingdan ortiq kishi jazoni ijro etish muassasalarida jazo muddatini o‘tamoqda. Bu haqda Oliy Majlis Qonunchilik palatasining Mudofaa va xavfsizlik masalalari qo‘mitasi tomonidan tashkil etilgan fraksiyalararo amaliy muloqotiga bag‘ishlangan yig‘ilishda aytib o‘tildi.

O‘zbekistonda 54 ta jazoni ijro etish muassasasi mavjud bo‘lib, ularning 18 tasi yopiq turdagi, 25 tasi manzil koloniya va 11 tasi tergov hibsxonalaridir. Ichki ishlar vazirligi taqdim etgan ma’lumotlarga ko‘ra, jazoni ijro etish tizimida 22 mingdan ortiq mahkumlarning 7 mingdan ortig‘i manzil koloniyalarda, 14 mingdan ortig‘i yopiq turdagi koloniyalarda jazo muddatini o‘tamoqda.

Qayd etilishicha, jazo muddatini o‘tayotgan mahkumlarni saqlash sharoitlarining shaffofligini ta’minlash hamda qiynoq va jismoniy tazyiq o‘tkazish bilan bog‘liq salbiy holatlarning oldini olish maqsadida tizimdagi 54 ta jazoni ijro etish muassasalari 3 280 ta zamonaviy videokuzatuv moslamalari bilan jihozlangan. Shundan, 2 203 tasi jazoni ijro etish muassasasi yashash sahniga, 432 tasi ishlab chiqarish sahniga, 645 tasi tashqi ma’muriy hududga o‘rnatilgan.

Shuningdek, tezkor-qidiruv, tergov sohasida qiynoqlarning oldini olish maqsadida ichki ishlar organlariga keltirilgan va ushlangan shaxslar bilan yangi tashkil etilgan 484 ta so‘rovxonada suhbat va so‘rovlar o‘tkazilmoqda.

Tergov bo‘linmalarida videokuzatuv vositalari hamda eshitish moslamalarisiz advokatlar o‘zlarining himoyasi ostidagi shaxs bilan holi uchrashishlari uchun alohida advokat xonalari tashkil etilgan. Tergov hibsxonalaridagi mavjud tergovchilar xonalariga jami 123 dona zamon talablariga javob beradigan ovoz yozishga mo‘ljallangan videokuzatuv vositalari o‘rnatilgan.

Ma’lumot o‘rnida keltirilishicha, 2020-yil 1-avgust holatiga ko‘ra, AQShda har yuz ming odamdan 639 nafari, Rossiyada 340 nafari, Turkiyada 335 nafari, Belarusda 343 nafari, O‘zbekistonda 68 nafari jazoni ijro etish muassasalarida jazo muddatini o‘tamoqda.

Avvalroq Oliy Majlisning Inson huquqlari bo‘yicha vakili (Ombudsman) Ulug‘bek Muhammadiyev O‘zbekiston Markaziy Osiyoda mahkumlar soni eng kam mamlakatlardan biri hisoblanishini aytgandi.