Қашқадарё вилоятида 167 минг 300 нафар аҳоли ишлаш учун хорижий давлатларга чиқиб кетган. Бу ҳақда Қарши шаҳридаги Журналистлар уйида вилоят Бандлик бош бошқармаси масъуллари иштирокидаги матбуот анжуманида маълум қилинди, дея хабар берди «Дарё» мухбири.
Таъкидланишича, хорижда ишловчи қашқадарёликларнинг 70 фоиздан ортиғи Россияда ишлайди.
«Хорижга ишлашга кетган 167 минг 300 нафар қашқадарёликнинг 70 фоиздан кўпроғи Россияда ишлаётган бўлса, қолгани Қозоғистон, Кореяда, 7 фоизи эса Туркия ва Арабистон давлатларида меҳнат қилмоқда», — дейди вилоят ҳокимининг ташқи меҳнат миграцияси масалалари бўйича ёрдамчиси Алишер Раҳмонов.
Алишер Раҳмоновнинг маълумот беришича, хорижга кетган қашқадарёликларнинг 21 минг 700 нафардан ортиғини аёллар ташкил этади.
Вилоят бандлик бош бошқармаси бошлиғи Бекзод Қурбоновнинг қайд этишича, вилоятдаги мавжуд 3 миллион 318 минг нафар аҳолининг 1 миллион 364 минг 500 нафари меҳнатга лаёқатли иқтисодий аҳоли ҳисобланади.
«Вилоятда ишсиз фуқароларимиз 154 минг 900 нафар бўлиб, бу вилоят аҳолисининг 11,4 фоизини ташкил қилади. Пандемиядан аввал бу кўрсаткич 9,1 фоизни ташкил этган бўлса, пандемия даврида 13,4 фоизга етди. Пандемия сабаб вилоятимизда ҳам ишсизлар сони ортди. Шу сабаб ҳам пандемия даврида иш ўрнини йўқотган меҳнат мигрантлари ва ишсиз фуқароларнинг 35 минг 600 нафари мавсумий жамоат ишларга жалб этилди», — дейди бошқарма бошлиғи.
Матбуот анжуманида айтилишича, 2021 йилда вилоятдан 11 минг 600 нафар ишсиз фуқаро бошқарма ёрдами билан хорижга ишга юборилади.
Изоҳ (0)