Markaziy bank 2021-yilda islomiy moliya konsepsiyasini o‘z ichiga olgan nobank kredit tashkilotlari to‘g‘risida qonun loyihasini ishlab chiqishni rejalashtirmoqda. Bu haqda Markaziy bank raisi o‘rinbosari Behzod Hamroyevga tayanib, “Gazeta.uz” ma’lum qildi.
Bunday taklifni Prezident Shavkat Mirziyoyev 29-dekabr kuni parlamentga qilgan Murojaatnomasida aytib o‘tdi. Davlat rahbari Markaziy bankka moliya bozorida raqobatni kuchaytirish, shuningdek, islomiy moliya mexanizmlarini joriy etish maqsadida huquqiy asos yaratish uchun 1-fevralgacha nobank kredit tashkilotlari to‘g‘risidagi qonun loyihasini ko‘rib chiqish topshirig‘ini berdi.
Islom banki shariat tamoyillariga mos keladigan moliyaviy faoliyatdir. Islom bankining asosiy xarakteristikasi bu kredit miqdori va muddatiga qarab hisoblangan foizlar yoki stavkalarni olishni taqiqlash hisoblanadi. Ushbu taqiq musulmonlarning ijtimoiy adolat va tenglik to‘g‘risidagi qonunlari bilan izohlanadi.
Behzod Hamroyev yangi qonun moliya bozorida raqobatni kuchaytirishini ta’kidladi. Nobank tashkilotlarga ko‘proq xizmatlar ko‘rsatish huquqi beriladi.
Sentabr oyi boshida “Nobank kredit tashkilotlari va mikromoliyaviy faoliyat to‘g‘risida”gi qonun loyihasi muhokamaga qo‘yildi, ammo u islomiy moliyalashtirishni nazarda tutmagan.
2018-yil may oyida muhokama uchun taqdim etilgan Prezident farmoni loyihasi O‘zbekistonda islomiy bank va moliya infratuzilmasini yaratishni rejalashtirgan.
Hujjatda foizlar (ribo) shaklida ish haqini to‘lashni taqiqlash, loyihada ishtirok etish ulushiga mutanosib ravishda tadbirkor bilan foyda va zararni taqsimlash, sug‘urta faoliyatini (takaful), lizing faoliyatini (ijara), qimmatli qog‘ozlar bilan operatsiyalar (suquq) va islomiy moliyalashtirish tamoyillariga asoslangan boshqa operatsiyalar amalga oshirishni tartibga soluvchi normativ-huquqiy hujjatlarni ishlab chiqish kutilmoqda.
Avvalroq O‘zbekistonda islom moliyalashtirish tamoyillari asosida qimmatli qog‘ozlar joriy etilishi haqida xabar berilgandi.
Izoh (0)