Korrupsiyaga qarshi kurashish agentligi Andijondagi qurilishga aloqador davlat idoralari rahbarlarining milliardlab summadagi davlat obyektlarini qarindosh-urug‘chilik yo‘li bilan o‘zlashtirayotgani bo‘yicha tekshiruv olib bormoqda, deya xabar qildi “Kun.uz”.
Qayd etilishicha, 2020-yil dekabr oyida Andijon viloyatida qurilishga aloqador davlat idoralari rahbarlarining milliardlab summadagi davlat obyektlarini qarindosh-urug‘chilik yo‘li bilan o‘zlashtirayotgani haqidagi ma’lumotlar jamoatchilikning keng muhokamasiga sabab bo‘ldi.
Korrupsiyaga qarshi kurashish agentligi huzurida tashkil qilingan ishchi guruh ushbu holatlar o‘rganilayotganini ma’lum qildi.
Agentlik yetakchi inspektori Zafarbek Qo‘chqorov tekshirish jarayoni haqida nashrga qo‘shimcha ma’lumot taqdim etdi.
“Hozirgi kunda Korrupsiyaga qarshi kurash agentligi tomonidan ushbu masala alohida nazoratga olinib, tekshirish-o‘rganish ishlari amalga oshirilmoqda. Tegishli tashkilotlardan malakali mutaxassislar jalb etilgan holda ishchi guruh tuzilgan hamda guruh a’zolarining vazifa-funksiyalari aniq belgilab olingan. Hozirga qadar manfaatlar to‘qnashuvi alomatlari aniqlangan 17 ta obyekt bo‘yicha o‘rganish o‘tkazilyapti.
Ijtimoiy tarmoqlarda e’lon qilingan har bitta obyekt bo‘yicha tegishli hujjatlar “Yagona buyurtmachi xizmat injiniring” kompaniyasidan chaqirtirib olingan. Har bitta obyekt bo‘yicha loyiha-smeta hujjatlari, ularning ekspertizasi, o‘tkazilayotgan tanlov-tender jarayonlarining “Davlat xaridlari to‘g‘risida”gi qonun tartib-taomillariga va qonunosti normativ aktlarga muvofiqligi o‘rganib chiqilmoqda.
Hozirda tekshiruv deyarli boshlanish nuqtasida turibdi va yakunlari bo‘yicha o‘zimizning xulosamiz, yakuniy fikrimizni bayon qilamiz”, – dedi Zafarbek Qo‘chqorov.
Agentlik rasmiysi Zafarbek Qo‘chqorov o‘rganish bosqichlariga, ularning natijadorligiga salbiy ta’sir qilishi mumkinligi ehtimolini nazarda tutib, ishchi guruhi tarkibi oshkor etilmasligini aytgan.
Avvalroq Andijon viloyatida “Yagona buyurtmachi xizmati” IK rahbariga taalluqli kompaniya 20 milliard so‘mlik davlat buyurtmalarini qabul qilgani, shuningdek, Jizzax shahrini manzarali daraxtlar va gullar bilan bezash uchun 2 milliard so‘m sarflangani va ushbu davlat xaridini qo‘lga kiritgan kompaniya viloyat hokimi qiziga tegishli ekani, qolaversa, Jizzaxda 292,1 milliard so‘mlik davlat buyurtmalarini qo‘lga kiritgan kompaniyalar viloyat hokimi o‘rinbosariga aloqador bo‘lishi mumkinligi to‘g‘risida xabar berilgandi.
Shundan so‘ng Andijon viloyati prokuraturasi Andijonda davlat xaridlaridagi “tanish-bilishchilik” holatlarini o‘rganishi hamda Korrupsiyaga qarshi kurashish agentligi Jizzaxda viloyat hokimining qizi qo‘lga kiritgan bir necha milliardlik davlat buyurtmalari bo‘yicha tekshiruv o‘tkazishini ma’lum qildi.
Izoh (0)