O‘zbekistonda 2020-yil davomida internet xizmatlari 29 foizga arzonlashtirilib, 1 megabit/sekund trafik 40 ming so‘mni tashkil qildi. Bu haqda AOKAdagi brifingda axborot texnologiyalari va kommunikatsiyalarini rivojlantirish vaziri Shuhrat Sodiqov ma’lum qildi.
“Mavjud texnik quvvatlarimizni keskin oshirish hisobiga o‘tgan yil dekabr oyidan aloqa kanallari ijarasi tariflari 2 barobarga, o‘tgan yil davomida internet xizmatlari tariflari esa 29 foizga arzonlashtirilishiga erishildi.
Ijtimoiy soha obyektlariga, jumladan, 8 095 ta xalq ta’limi, 5 440 ta maktabgacha ta’lim va 3 207 ta sog‘liqni saqlash muassasalarigacha jami 14 ming kilometr optik tolali aloqa liniyalari tashkil etildi va yuqori tezlikdagi internet tarmog‘iga ulanish imkoniyati yaratildi.
2020-yilning to‘rtinchi choragida respublikamiz bo‘yicha 14 ta, ya’ni har bir hududda bittadan tayanch IT maktablari tashkil etildi va zamonaviy texnologiyalar bilan jihozlandi”, – deydi Shuhrat Sodiqov.
Bundan tashqari, vazirning qo‘shimcha qilishicha, “Bir million dasturchi” loyihasi doirasida 120 mingdan ziyod o‘quvchi jalb qilingan, ulardan 18 ming nafardan ortig‘i kurslarni muvaffaqiyatli tugatgan.
Avvalroq O‘zbekistonda aholini internet tarmog‘i bilan qamrab olish darajasi 87 foizga yetkazilgani, O‘zbekistondagi 12 246 ta aholi yashash maskanlarining 56,8 foizida 3G, 95,5 foizida 4G aloqasi mavjud emasligi aniqlangani haqida xabar berilgandi.
Izoh (0)