Коррупцияга қарши курашиш агентлиги Андижондаги қурилишга алоқадор давлат идоралари раҳбарларининг миллиардлаб суммадаги давлат объектларини қариндош-уруғчилик йўли билан ўзлаштираётгани бўйича текширув олиб бормоқда, дея хабар қилди «Kun.uz».
Қайд этилишича, 2020 йил декабрь ойида Андижон вилоятида қурилишга алоқадор давлат идоралари раҳбарларининг миллиардлаб суммадаги давлат объектларини қариндош-уруғчилик йўли билан ўзлаштираётгани ҳақидаги маълумотлар жамоатчиликнинг кенг муҳокамасига сабаб бўлди.
Коррупцияга қарши курашиш агентлиги ҳузурида ташкил қилинган ишчи гуруҳ ушбу ҳолатлар ўрганилаётганини маълум қилди.
Агентлик етакчи инспектори Зафарбек Қўчқоров текшириш жараёни ҳақида нашрга қўшимча маълумот тақдим этди.
«Ҳозирги кунда Коррупцияга қарши кураш агентлиги томонидан ушбу масала алоҳида назоратга олиниб, текшириш-ўрганиш ишлари амалга оширилмоқда. Тегишли ташкилотлардан малакали мутахассислар жалб этилган ҳолда ишчи гуруҳ тузилган ҳамда гуруҳ аъзоларининг вазифа-функциялари аниқ белгилаб олинган. Ҳозирга қадар манфаатлар тўқнашуви аломатлари аниқланган 17 та объект бўйича ўрганиш ўтказиляпти.
Ижтимоий тармоқларда эълон қилинган ҳар битта объект бўйича тегишли ҳужжатлар «Ягона буюртмачи хизмат инжиниринг» компаниясидан чақиртириб олинган. Ҳар битта объект бўйича лойиҳа-смета ҳужжатлари, уларнинг экспертизаси, ўтказилаётган танлов-тендер жараёнларининг «Давлат харидлари тўғрисида»ги қонун тартиб-таомилларига ва қонуности норматив актларга мувофиқлиги ўрганиб чиқилмоқда.
Ҳозирда текширув деярли бошланиш нуқтасида турибди ва якунлари бўйича ўзимизнинг хулосамиз, якуний фикримизни баён қиламиз», – деди Зафарбек Қўчқоров.
Агентлик расмийси Зафарбек Қўчқоров ўрганиш босқичларига, уларнинг натижадорлигига салбий таъсир қилиши мумкинлиги эҳтимолини назарда тутиб, ишчи гуруҳи таркиби ошкор этилмаслигини айтган.
Аввалроқ Андижон вилоятида «Ягона буюртмачи хизмати» ИК раҳбарига тааллуқли компания 20 миллиард сўмлик давлат буюртмаларини қабул қилгани, шунингдек, Жиззах шаҳрини манзарали дарахтлар ва гуллар билан безаш учун 2 миллиард сўм сарфлангани ва ушбу давлат харидини қўлга киритган компания вилоят ҳокими қизига тегишли экани, қолаверса, Жиззахда 292,1 миллиард сўмлик давлат буюртмаларини қўлга киритган компаниялар вилоят ҳокими ўринбосарига алоқадор бўлиши мумкинлиги тўғрисида хабар берилганди.
Шундан сўнг Андижон вилояти прокуратураси Андижонда давлат харидларидаги «таниш-билишчилик» ҳолатларини ўрганиши ҳамда Коррупцияга қарши курашиш агентлиги Жиззахда вилоят ҳокимининг қизи қўлга киритган бир неча миллиардлик давлат буюртмалари бўйича текширув ўтказишини маълум қилди.
Изоҳ (0)