Toshkent, Buxoro va Samarqand shaharlarida o‘tkazilgan dron shoular keyinchalik ob-havoga qarab O‘zbekistonning boshqa hududlarida ham tashkil etilishi kutilmoqda. Bu haqda Turizmni rivojlantirish davlat qo‘mitasi raisi Aziz Abduhakimov 9-yanvar kuni AOKAda bo‘lib o‘tgan brifingdan so‘ng “Daryo” muxbiri Mirolim Isajonovga bergan qisqa intervyusida ma’lum qildi.
“2021-yilda xalqimiz uchun ko‘plab turli yangiliklar qilishni rejalashtirganmiz. Poytaxtimizda birinchi marta tashkil etilgan ochiq osmon ostidagi muz maydonidan tashqari, dron shoulari orqali ham aholiga xursandchilik ulashyapmiz. Bu loyiha ilk bor Toshkent shahrida tashkil etilgan bo‘lsa, bugungi kunda viloyatlarda ham uyushtirilmoqda. Xususan, Samarqand va Buxoro shaharlarida o‘tkazildi. Keyinchalik, ob-havoga qarab, Xiva va Nukus shaharlari, vodiy viloyatlari hamda boshqa hududlarda ham chiroyli dron shoularni tashkil etish rejamizda bor. Bu ichki turizmni rivojlantirishga ham o‘ziga yarasha xizmat qiladi”, dedi Abduhakimov.
Avvalroq, Tashkent City bog‘ida dron shou o‘tkazilgani, unda musiqa sadosi ostida 8 xil dinamik shaklni yaratish uchun 500 ta dron havoga ko‘tarilgani hamda 30 kishilik guruh nazorati ostida uchar mashinalar yordamida archa daraxti, sovg‘a qutisi, “2021” va boshqa shakllar namoyish etilgani haqida xabar berilgan edi.
Izoh (0)