O‘zbekistonda yangi geoportal tizimi test rejimida ish boshlashi kutilmoqda. Uning yordamida xavfli zonalar va xavfli hududlar kartaga oldindan tushiriladi hamda ogohlantirish tizimi yo‘lga qo‘yiladi. Bu haqda 9-yanvar kuni AOKAda bo‘lib o‘tgan brifingda ma’lum qilindi, deya xabar bermoqda “Daryo” muxbiri Mirolim Isajonov.
Gidrometeorologiya xizmati markazi bosh direktori Sherzod Habibullayevning ta’kidlashicha, 2021-yildan gidrometeorologiya ma’lumotlarini sotib olish jarayoniga o‘tish rejalashtirilgan.
“Prezidentimiz Murojaatnomasidan kelib chiqqan holda davlatning iqtisodiyotda ulushini kamaytirish maqsadida oldimizga katta bir maqsad qo‘ydik. Aniqrog‘i, hozirgi ko‘rsatayotgan xizmatlarimizni ikki baravarga ham sifat, ham tushum jihatdan oshirishni rejalashtirganmiz. Shuni qayd etish kerakki, quyi tashkilotlarimiz faoliyatida hech qanday xizmat ko‘rsatilmagan. Sohamiz bo‘yicha xorij davlatlari tajribasini o‘rganganimizda ulardagi tushum 40-50 foiz, rivojlangan mamlakatlarda esa 60 foizgacha o‘zi ko‘rsatgan xizmatdan shakllanar ekan. Shuni hisobga olgan holda biz ham quyi tashkilotlarimizning oldiga xizmat ko‘rsatish masalasini asosiy maqsad sifatida qo‘ydik.
Gidrometeorologiya xizmatining asosiy foydalanuvchisi — davlat tashkilotlari, yirik klasterlar, yirik fermerlar va, albatta, investorlardan iborat. Joriy yildan bor e’tiborimizni ko‘rsatadigan xizmatlarimizning sifati va unumdorligini oshirishga qaratmoqchimiz. 2022-yilda esa davlat tomonidan beriladigan mablag‘ni 30 foizga kamaytirishni ko‘zda tutganmiz. Shu orqali iqtisodiyotni bosqichma-bosqich rivojlantiramiz. Bizning sohada xususiy sektor umuman shakllanmagan, faqat davlat, ya’ni O‘zgidrometeorologiya tomonidan xizmat ko‘rsatiladi xolos. Xususiy bozor tashqarida bor, ammo O‘zbekistonda mavjud emas. Shuning birinchi qadamini 2021-yilda tashlamoqchimiz, ya’ni ma’lumotlarni sotib olish jarayoniga o‘tmoqchimiz. Bu asosiy vazifalarimizdan birinchisi hisoblanadi”, dedi Habibullayev.
Uning qo‘shimcha qilishicha, shu yildan O‘zbekiston Milliy universitetida Rossiya Gidrometeorologiya universitetining shu yo‘nalishdagi fakulteti ochiladi.
Eslatib o‘tamiz, noyabr oyining boshlarida O‘zbekiston Gidrometeorologiya xizmati samarali faoliyat yuritish uchun xodimlarning oylik maoshlari kamligi va malakali kadrlar ketib qolishi kabi masalalarni zudlik bilan hal etish lozimligini ma’lum qilgandi. Shu kuni Prezident Shavkat Mirziyoyev mamlakatda gidrometeorologiya xizmati faoliyatini takomillashtirish bo‘yicha ustuvor vazifalar muhokamasi yuzasidan yig‘ilish o‘tkazgandi.
Izoh (0)