Qashqadaryo hududiy elektr tarmoqlari korxonasi rahbari Anvar Muzapov 2021-yilni sham yorug‘ida kutib olgan kosonliklardan uzr so‘radi. Bu haqda korxona mas’ullari tomonidan 9-yanvar kuni bo‘lib o‘tgan press-turda ma’lum qilindi, deya xabar berdi “Daryo” muxbiri.
Ma’lum bo‘lishicha, “Qashqadaryo hududiy elektr tarmoqlari korxonasi” rahbariyati 2021-yil 9-yanvar kuni viloyatdagi jurnalist va blogerlar uchun press-tur tashkil qilgan.
Press-turda jurnalist va blogerlar elektr energiyasining aholiga qay tarzda yetib borishi va yuzaga kelayotgan muammolarning sabablari haqida ma’lumot olgan. Shuningdek, viloyat “Hududiy elektr tarmoqlari korxonasi” ishchilari faoliyati bilan tanishib, elektr energiyasidagi taqchillik sababini o‘rgangan.
Press-tur so‘ngidagi davra suhbatida so‘z olgan korxona rahbari Anvar Muzapov “Daryo” muxbirining “Yangi yilni elektr tokisiz kutib olgan kosonliklar uchun kimdir javob berdimi yoki voqea imi-jimida yopildimi?”, degan savoliga javob berar ekan, holat uchun o‘zini aybdor sanashini aytib, kosonliklardan uzr so‘ragan.
“2020-yil 31-dekabr kuni soat 21:14 da o‘chgan elektr tokini Yangi yil oqshomida qayta yoqolmadik. Bu esa kosonliklarning Yangi yilni ‘svet’siz kutib olishiga olib keldi. Buning uchun kosonliklardan uzr so‘raymiz”, — dedi viloyat hududiy elektr tarmoqlari korxonasi rahbari.
Anvar Muzapovning ma’lumot berishicha, Koson tumanidagi asosiy podstansiya Koson 110\35 \10 KVdagi nosozlik podstansiya eskirgani va mas’ul shaxslarning mas’uliyatsizligi sabab sodir bo‘lgan.
“Koson nimstansiyasining qurilganiga ellik yil bo‘lgan. Aynan shu Yangi yil oqshomidagi nosozlik kelib chiqishiga birinchi sabab bo‘lsa, mas’ul vazifaga javobgar shaxslarning vazifasiga sovuqqonlik qilishi holatni keltirib chiqargan ikkinchi sabab bo‘ladi. Bu holatga yo‘l qo‘ygan shaxslarni vakolatimizdan kelib chiqqan holda javobgarlikka tortdik”, — deydi Anvar Muzapov.
Anvar Muzapovning qo‘shimcha qilishicha, viloyatda hududiy elektr tarmoqlari korxonasiga tegishli 171 ta podstansiya mavjud bo‘lib, ularning talabga javob bermaydiganlari birin-ketin ta’mirlanadi. Ta’mirlanadigan podstansiyalar orasida Koson tumanidagi asosiy podstansiya Koson 110\35 \10 KV podstansiyasi ham bor.
Eslatib o‘tamiz, avvalroq Qashqadaryo viloyatining Koson tumanida 25 ta mahalla Yangi yil bayramini elektr tokisiz kutib olgani haqida xabar berilgandi.
Izoh (0)