Yevropa dori vositalari agentligi (EMA) 6-yanvar kuni AQShning Moderna vaksinasidan koronavirusga qarshi kurashda foydalanishga ruxsat berdi, deb xabar bermoqda “Interfaks”.
“Yevropa dori vositalari agentligi (EMA) Moderna vaksinasidan 18 yoshdan kattalarda koronavirus infeksiyasining oldini olishda foydalanish uchun ruxsat berdi”, — deb yozilgan agentlikning Twitter’dagi sahifasida.
Yevrokomissiya raisi Ursula fon der Lyayenning qayd etishicha, EMA Moderna vaksinasini xavfsiz va samarali deb baholadi. “Hozirda uni tasdiqlash va Yevropa Ittifoqida foydalanishni yo‘lga qo‘yish uchun bor kuchimiz bilan ishlayapmiz”, — degan u.
EMA ijrochi direktori Emer Kuk Moderna vaksinasi ayni paytdagi COVID-19 pandemiyasi bilan bog‘liq favqulodda holatni yengib o‘tishda yana bir vosita bo‘lishini ta’kidlagan.
“JSST pandemiya haqida e’lon qilganidan atigi bir yil o‘tib, vaksina bo‘yicha ikkinchi ijobiy tavsiyanoma berildi”, — degan u. Uning so‘zlari EMA saytida keltirilgan.
Qayd etilishicha, agentlikning insonlar uchun dori vositalari qo‘mitasi “vaksinaning sifati, xavfsizligi va samaradorligi to‘g‘risidagi ma’lumotlarni sinchkovlik bilan baholab chiqqan va kelishuv asosida Yevropa komissiyasiga uni bozorga chiqarilishi uchun rasmiy tasdiqlashni tavsiya qilgan”.
Avvalroq Yevropaning dori vositalari bo‘yicha agentligi (EMA) Yevropa Ittifoqida Pfizer va BioNTech kompaniyalari tomonidan yaratilgan koronavirusga qarshi vaksinadan foydalanishga ruxsat berishni tavsiya etgani haqida xabar berilgandi.
Yevropa Ittifoqida COVID-19’ga qarshi ommaviy emlash 26-dekabrdan boshlandi.
Izoh (0)