AQShning Viskonsin shtatida koronavirusga qarshi vaksina partiyasini qasddan yaroqsiz holga keltirgan farmatsevt hibsga olingani haqida xabar berilgandi. Business Insider’ning sud materiallariga tayanib ma’lum qilishicha, 44 yoshli ushbu farmatsevt Stiven Brandenburg vaksina odamlarga ziyon yetkazishi va ularning DNKsini o‘zgartirishiga ishongan.
Voqea Viskonsin shtatida sodir bo‘lgan. Aurora Health Care tibbiyot muassasasi tarmog‘ining sobiq xodimi taxminan 500 doza Moderna vaksinasini muzlatgichdan chiqarib, keyinchalik samarasiz bo‘lib qolishini bilgan holda uni qasddan saqlash xonasi tashqarisida qoldirgan.
Dastlab u vaksinani boshqa preparatlarni olayotganda tasodifan muzlatgich tashqarisida qoldirganini aytgan. Keyinchalik preparatni qasddan buzgani va bundan oldin ham bir necha bor shunday qilganini tan olgan.
Politsiya unga nisbatan qasddan mulkka zarar yetkazish, moddiy zarar yetkazish va fuqarolarning sog‘lig‘iga xavf tug‘diradigan boshqa harakatlar sodir etganlik ayblovini qo‘ygan. Dastlabki ma’lumotlarga ko‘ra, sobiq farmatsevt o‘z harakati bilan 8 mingdan 11 ming dollargacha moddiy zarar yetkazgan. Garov miqdori 10 ming dollar miqdorida belgilangan.
Avvalroq, dekabr oyi boshida Nyu-York shtati politsiyasi asosan yahudiy diasporasiga xizmat ko‘rsatadigan mahalliy klinikalar tarmog‘ida tekshiruv boshlagandi. Tibbiyot muassasalari rahbariyati vaksinadan noqonuniy foydalanish, uni jismoniy shaxslarga tarqatish va vakolatli organlar tomonidan tasdiqlangan vaksinatsiya rejasini buzganlikda gumon qilingan.
Avvalroq AQShda COVID-19’ga qarshi vaksina olishdagi firibgarliklar bo‘yicha tekshiruv boshlangani, bunday firibgarliklar uchun 1 million dollar jarima solinishi haqida xabar berilgandi.
Izoh (0)