Birinchi marta Buyuk Britaniya hududida aniqlangan koronavirusning yangi shtammi ayni paytgacha 41 ta mamlakat va hududda qayd etilgan, deb yozadi “RBK” Jahon sog‘liqni saqlash tashkiloti (JSST)ning haftalik axborot epidemiologik byulleteniga tayanib.
“5-yanvar holatiga ko‘ra, koronavirusning birinchi marta Birlashgan Qirollikda aniqlangan VOC-202012/01 turi JSSTning oltita mintaqasidan beshtasida, yana 40 ta davlat (hudud, tumanlar)da kam sonli holatlar bilan qayd etildi”, — deyiladi xabarda.
JSST aniqlik kiritishicha, dastlabki ma’lumotlarga ko‘ra, “britancha” mutatsiya tezroq tarqaladi, ammo u COVID-19’ning boshqa variantlaridan xavfliroq ekani borasida dalillar yo‘q.
Shuningdek, tashkilot xabarida dastavval Janubiy Afrikada aniqlangan 501Y.V2 shtammining tarqalishi bo‘yicha ma’lumotlar keltiriladi. Hozir ushbu shtamm bilan kasallanish holatlari yettita mamlakatda qayd etilgan.
JSST ma’lumotlariga ko‘ra, dunyoda jami 83 milliondan ortiq kishi koronavirusga chalingan, shularning 1,8 milliondan ziyodi vafot etgan. Ketma-ket uch haftadan buyon butun dunyoda har yetti kunda 4 milliondan ortiq yangi kasallanish holatlari aniqlanmoqda. So‘nggi bir hafta ichida yangi o‘lim holatlari 3 foizga o‘sib, 76 mingtani tashkil qildi.
Buyuk Britaniyada koronavirusning yangi turi aniqlangani, shu tufayli mamlakatning ayrim hududlarida kasallik tarqalish sur’ati tezlashgani haqida 14-dekabr kuni mahalliy Sog‘liqni saqlash vazirligi rahbari Mettyu Xenkok ma’lum qildi. Buyuk Britaniya bosh vaziri Boris Jonsonning so‘zlariga ko‘ra, ushbu turdagi koronavirus avvalgilaridan 70 foizga yuqumliroq, lekin undan xavfli emas. Keyinroq SARS-CoV-2’ning bu varianti bir qator boshqa mamlakatlarda, xususan, AQSh, Xitoy, Kanada, Turkiya, BAA, Germaniya va Shveysariya, Tailand, Gretsiya, Slovakiya, Vyetnam va Kiprda ham aniqlandi.
Avvalroq Janubiy Afrika Respublikasi (JAR)da ham shunga o‘xshash mutatsiyadagi virus topilgani haqida xabar berilgan edi. Virusning yangi varianti hozirgi vaksinalar hosil qiladigan immunitetdan kuchliroq bo‘lishi mumkin, degan taxminlar uchun hozircha biror-bir asos yo‘q.
Izoh (0)