AQSh vitse-prezidenti Mayk Pens Oq uy rahbari Donald Trampga saylovchilar hay’ati a’zolarining ovoz berish natijalarini bekor qilish huquqiga ega emasligini ma’lum qildi. Vitse-prezidentning pozitsiyasi haqida The New York Times (NYT) o‘z manbalariga tayanib yozdi. Tramp gazeta xabarini yolg‘on deb atadi. Vitse-prezidentning o‘zi esa NYT maqolasini izohlaganicha yo‘q. Bu haqda “Kommersant” xabar bermoqda.
NYT ma’lumotlariga ko‘ra, prezident bilan birgalikda tushlik qilish vaqtida Pens o‘zining ovoz berish yakunlariga ta’sir o‘tkazish imkoniyatlari yuzasidan shubha bildirgan. Bundan bir kun avval Tramp Twitter’da vitse-prezidentda saylovchilar hay’atining ovoz berish natijalarini haqiqiy emas deb topish uchun vakolat borligi haqida yozgandi.
“New York Times’ning vitse-prezident, go‘yoki, bugun men bilan suhbat chog‘ida aytgan gaplari haqidagi reportaji — bu yolg‘on xabar. U hech qachon bunaqa gap aytgani yo‘q. Vitse-prezident va men vitse-prezident chora ko‘rish uchun vakolatlarga ega degan fikrga to‘liq qo‘shilamiz”, — deya maqolaga munosabat bildirdi Donald Tramp.
Oq uy rahbari qo‘shimcha qilishicha, AQSh Konstitutsiyasiga muvofiq, vitse-prezident bir qator imkoniyatlarga ega. “U natijalar sertifikatsiyasini bekor qilishi yoki o‘zgartirish va sertifikatlash uchun ularni shtatlarga qaytarib yuborishi mumkin. U, shuningdek, noqonuniy va poraxo‘rlik orqali qo‘lga kiritilgan natijalar sertifikatsiyasini bekor qilib, ularni ‘bitta shtat — bitta ovoz’ hisobida ovoz berish uchun Vakillar palatasiga yuborishi mumkin”, — deya qo‘shib qo‘ydi u.
6-yanvar kuni AQSh Kongressining ikkala palatasi qo‘shma majlisida saylovchilar hay’atidagi ovoz berish natijalari tasdiqlanadi. Vitse-prezident Senat raisi sifatida saylov yakunlarini rasman sertifikatlaydi (tasdiqlaydi). Majlis Toshkent vaqti bilan soat 23:00 da boshlanadi.
Ma’lumot uchun, 2021-yil 20-yanvar kuni saylangan davlat rahbari demokrat Jo Bayden o‘z lavozimiga kirishishi kerak. Dekabr o‘rtalarida saylovchilar hay’ati Trampning saylovdagi bosh raqibini Amerikaning 46-prezidenti deb e’lon qildi. Bayden saylovchilar hay’ati a’zolarining 300 dan ortiq ovozini, amaldagi prezident esa 230 dan ziyodroq ovozni qo‘lga kiritdi. Baydenning inauguratsiyasi an’anaga ko‘ra Vashingtonda bo‘lib o‘tadi.
Izoh (0)