Европа дори воситалари агентлиги (EМА) 6 январь куни АҚШнинг Moderna вакцинасидан коронавирусга қарши курашда фойдаланишга рухсат берди, деб хабар бермоқда «Интерфакс».
«Европа дори воситалари агентлиги (EМА) Moderna вакцинасидан 18 ёшдан катталарда коронавирус инфекциясининг олдини олишда фойдаланиш учун рухсат берди», — деб ёзилган агентликнинг Twitter’даги саҳифасида.
Еврокомиссия раиси Урсула фон дер Ляйеннинг қайд этишича, EМА Moderna вакцинасини хавфсиз ва самарали деб баҳолади. «Ҳозирда уни тасдиқлаш ва Европа Иттифоқида фойдаланишни йўлга қўйиш учун бор кучимиз билан ишлаяпмиз», — деган у.
EМА ижрочи директори Эмер Кук Moderna вакцинаси айни пайтдаги COVID-19 пандемияси билан боғлиқ фавқулодда ҳолатни енгиб ўтишда яна бир восита бўлишини таъкидлаган.
«ЖССТ пандемия ҳақида эълон қилганидан атиги бир йил ўтиб, вакцина бўйича иккинчи ижобий тавсиянома берилди», — деган у. Унинг сўзлари EМА сайтида келтирилган.
Қайд этилишича, агентликнинг инсонлар учун дори воситалари қўмитаси «вакцинанинг сифати, хавфсизлиги ва самарадорлиги тўғрисидаги маълумотларни синчковлик билан баҳолаб чиққан ва келишув асосида Европа комиссиясига уни бозорга чиқарилиши учун расмий тасдиқлашни тавсия қилган».
Аввалроқ Европанинг дори воситалари бўйича агентлиги (EМА) Европа Иттифоқида Pfizer ва BioNTech компаниялари томонидан яратилган коронавирусга қарши вакцинадан фойдаланишга рухсат беришни тавсия этгани ҳақида хабар берилганди.
Европа Иттифоқида COVID-19’га қарши оммавий эмлаш 26 декабрдан бошланди.
Изоҳ (0)