“Paxtakor”da Shota Arveladzening o‘rnini niderlandiyalik murabbiy egallashi aytildi. Klub matbuot xizmati esa bu xabarni rad etdi

Futbol bo‘yicha Toshkentning “Paxtakor” klubida bosh murabbiy masalasi ochiq qolmoqda.

“Championat.asia” nashri “Paxtakor”dan ketganini e’lon qilgan Shota Arveladzening o‘rnini uning yordamchisi sifatida jamoada ishlab kelgan niderlandiyalik mutaxassis Piter Hyuistra egallashi haqida xabar berdi. “Paxtakor” matbuot xizmati esa ushbu xabarni rad etib chiqdi.

“Paxtakor” murabbiylar shtabida o‘zgarish bo‘lgani yo‘q

OAV orqali “Paxtakor” murabbiylari shtabida o‘zgarish bo‘lgani haqida tarqatilayotgan ma’lumot noto‘g‘ri. “Paxtakor” futbol klubi murabbiylar shtabida o‘zgarish bo‘lgani haqida turli internet saytlari va ijtimoiy tarmoqlarda ma’lumot tarqatildi. Biroq klub rahbariyati hozircha murabbiylar shtabida o‘zgarishni amalga oshirmagan. Bunday o‘zgarish amalga oshirilgan taqdirda darhol “Paxtakor” futbol rasmiy sayti va ijtimoiy tarmoqlarida e’lon qilinadi.

“Paxtakor” rasmiy bayonoti

Ma’lumot uchun, Piter Hyuistra 1967-yil 18-yanvarda Niderlandiyada tug‘ilgan. Qanot hujumchisi pozitsiyasida harakat qilgan. Futbolchilik faoliyati davomida “Groningen” (1984—1987), “Tvente” (1987—1990), “Reynjers” (1990—1995), “Sanfrechche Xirosima” (1995—1996), “Lyors” (1997—2000) hamda “Rozendal” (2000—2001) klublarida faoliyat olib borgan.

Niderlandiya terma jamoasida 8 ta o‘yin o‘tkazgan.

Murabbiylik faoliyatini “Groningen” klubida yoshlar jamoasini boshqarishdan (2001—2005) boshlagan. 2005—2009-yillarda “Ayaks” va “Vitess” jamoalarida yordamchi murabbiy sifatida ishlgan. 2017-yil iyun oyidan boshlab “Paxtakor”da yordamchi murabbiy bo‘lib ishlab kelayotgandi.