«Пахтакор»да Шота Арвеладзенинг ўрнини нидерландиялик мураббий эгаллаши айтилди. Клуб матбуот хизмати эса бу хабарни рад этди

Футбол бўйича Тошкентнинг «Пахтакор» клубида бош мураббий масаласи очиқ қолмоқда.

«Championat.asia» нашри «Пахтакор»дан кетганини эълон қилган Шота Арвеладзенинг ўрнини унинг ёрдамчиси сифатида жамоада ишлаб келган нидерландиялик мутахассис Питер Ҳюистра эгаллаши ҳақида хабар берди. «Пахтакор» матбуот хизмати эса ушбу хабарни рад этиб чиқди.

«Пахтакор» мураббийлар штабида ўзгариш бўлгани йўқ

ОАВ орқали «Пахтакор» мураббийлари штабида ўзгариш бўлгани ҳақида тарқатилаётган маълумот нотўғри. «Пахтакор» футбол клуби мураббийлар штабида ўзгариш бўлгани ҳақида турли интернет сайтлари ва ижтимоий тармоқларда маълумот тарқатилди. Бироқ клуб раҳбарияти ҳозирча мураббийлар штабида ўзгаришни амалга оширмаган. Бундай ўзгариш амалга оширилган тақдирда дарҳол «Пахтакор» футбол расмий сайти ва ижтимоий тармоқларида эълон қилинади.

«Пахтакор» расмий баёноти

Маълумот учун, Питер Ҳюистра 1967 йил 18 январда Нидерландияда туғилган. Қанот ҳужумчиси позициясида ҳаракат қилган. Футболчилик фаолияти давомида «Гронинген» (1984—1987), «Твенте» (1987—1990), «Рейнжерс» (1990—1995), «Санфречче Хиросима» (1995—1996), «Лёрс» (1997—2000) ҳамда «Розендал» (2000—2001) клубларида фаолият олиб борган.

Нидерландия терма жамоасида 8 та ўйин ўтказган.

Мураббийлик фаолиятини «Гронинген» клубида ёшлар жамоасини бошқаришдан (2001—2005) бошлаган. 2005—2009 йилларда «Аякс» ва «Витесс» жамоаларида ёрдамчи мураббий сифатида ишлган. 2017 йил июнь ойидан бошлаб «Пахтакор»да ёрдамчи мураббий бўлиб ишлаб келаётганди.