Namanganda Nexia qarama-qarshi yo‘nalishga chiqib ketishi oqibatida Cobalt bilan to‘qnashdi, deya xabar bermoqda YHXBB.
Ta’kidlanishicha, 2021-yil 3-yanvar kuni soat 11:30 larda Namangan–Andijon yo‘lining 2 kilometrida Namangan tumani “Eshobod” MFY hududida Nexia rusumli avtomashinani Namangan shahar yo‘nalishida boshqarib ketayotgan haydovchi harakat xavfsizligini ta’minlay olmay, qarama-qarshi yo‘nalishga o‘tib ketgan.
Oqibatda Nexia o‘zining yo‘nalishida harakatlanib kelayotgan Cobalt bilan to‘qnashgan.
To‘qnashuv natijasida Cobalt haydovchisi olgan tan jarohati oqibatida shifoxonada vafot etgan. Cobaltda bo‘lgan 3 nafar yo‘lovchi (haydovchining oila a’zolari) bosh miya yopiq shikasti, bosh miyaning og‘ir darajada lat yeyishi tashxisi bilan shifoxonaga yotqizilgan.
Nexia rusumli avtomashina haydovchisi ham tos suyagining sinishi tashxisi bilan tan jarohati olib, shifoxonaga yotqizilgan.
Ushbu holat bo‘yicha Namangan tuman IIB huzuridagi Tergov bo‘linmasi tomonidan Jinoyat kodeksining 266-moddasi 2-qismi (odam o‘limiga sabab bo‘lgan transport vositalarini boshqarish qoidalarini buzish) bilan jinoyat ishi qo‘zg‘atilgan.
Avvalroq Namanganda 25 yoshli haydovchi Lacetti’da YTHga uchrab pastlikka qulagani, Oltiariqda Nexia beton to‘siqqa urilishi oqibatida haydovchi vafot etgani hamda Surxondaryoda 36 yoshli piyodani urib ketib, voqea joyidan yashiringan haydovchi qo‘lga olingani haqida xabar berilgandi.
Izoh (0)