Наманганда Nexia ва Cobalt тўқнашуви оқибатида ҳайдовчиларнинг бири вафот этди, тўрт киши шифохонага ётқизилди

Наманганда Nexia қарама-қарши йўналишга чиқиб кетиши оқибатида Cobalt билан тўқнашди, дея хабар бермоқда ЙҲХББ.

Таъкидланишича, 2021 йил 3 январь куни соат 11:30 ларда Наманган–Андижон йўлининг 2 километрида Наманган тумани «Эшобод» МФЙ ҳудудида Nexia русумли автомашинани Наманган шаҳар йўналишида бошқариб кетаётган ҳайдовчи ҳаракат хавфсизлигини таъминлай олмай, қарама-қарши йўналишга ўтиб кетган.

Оқибатда Nexia ўзининг йўналишида ҳаракатланиб келаётган Cobalt билан тўқнашган.

Тўқнашув натижасида Cobalt ҳайдовчиси олган тан жароҳати оқибатида шифохонада вафот этган. Cobaltда бўлган 3 нафар йўловчи (ҳайдовчининг оила аъзолари) бош мия ёпиқ шикасти, бош миянинг оғир даражада лат ейиши ташхиси билан шифохонага ётқизилган.

Nexia русумли автомашина ҳайдовчиси ҳам тос суягининг синиши ташхиси билан тан жароҳати олиб, шифохонага ётқизилган.

Ушбу ҳолат бўйича Наманган туман ИИБ ҳузуридаги Тергов бўлинмаси томонидан Жиноят кодексининг 266-моддаси 2-қисми (одам ўлимига сабаб бўлган транспорт воситаларини бошқариш қоидаларини бузиш) билан жиноят иши қўзғатилган.

Аввалроқ Наманганда 25 ёшли ҳайдовчи Lacetti’да ЙТҲга учраб пастликка қулагани, Олтиариқда Nexia бетон тўсиққа урилиши оқибатида ҳайдовчи вафот этгани ҳамда Сурхондарёда 36 ёшли пиёдани уриб кетиб, воқеа жойидан яширинган ҳайдовчи қўлга олингани ҳақида хабар берилганди.