Armaniston prezidenti Armen Sarkisyan London shahrida koronavirus bilan kasallandi, deya xabar bermoqda “Interfaks”.
“Ta’til paytida Armaniston prezidenti Yangi yilni oilasi va nabiralari bilan Londonda kutib oldi. 3-yanvar kuni prezident Buyuk Britaniya poytaxtida oyog‘idan operatsiya qilindi va amaliyot muvaffaqiyatli o‘tdi. Ammo Prezidentga koronavirus infeksiyasi alomatlari tashxisi qo‘yildi, uning testi musbat natija berdi”, — deyiladi prezident matbuot xizmati xabarida.
Xabarda aytilishicha, Sarkisyan vaqtincha o‘z vazifalarini masofadan turib bajarishda davom etadi.
Eslatib o‘tamiz, Buyuk Britaniya bosh vaziri Boris Jonson 4-yanvar kuni Angliyada yetti hafta davom etadigan yangi lokdaunni e’lon qildi. Unga ko‘ra, ta’lim muassasalari, restoranlar, o‘yin-kulgi zallari, shuningdek, zarur bo‘lmagan tovarlarni sotadigan do‘konlarga jiddiy cheklovlar qo‘llaniladi.
Avvalroq Braziliya vitse-prezidenti, Fransiya prezidenti Emmanuel Makron hamda Shvetsiya shahzodasi Karl Filipp va malika Sofiyada koronavirus aniqlangani haqida xabar berilgandi.
Izoh (0)