AQSh Demokratik partiyasidan kongressmenlar Ted Lyu va Ketlin Rays Federal qidiruv byurosidan (FQB) mamlakatning amaldagi prezidenti Donald Trampga nisbatan jinoiy tergov boshlashni talab qildi. Bu haqda Lyu o‘z Twitter’ida yozdi, deb xabar bermoqda “RBK”.
“Sobiq prokurorlar sifatida biz Ketlin Rey bilan shunday fikrdamizki, Donald Tramp Jorjiya shtati davlat kotibi Raffensperger bilan suhbat chog‘ida saylovchilarning 11 780 ta ovozini topishni talab qilganida bir nechta jinoyatlarni sodir etgan. Bugun biz FQBga jinoyat ishi ochishni talab qilib xat yubordik”, — deb yozdi kongressmen.
Avvalroq The Washington Post gazetasi Donald Tramp va Jorjiya davlat kotibi Bred Raffensperger o‘rtasidagi suhbat audiosini e’lon qilgan edi. Unda AQShning amaldagi prezidenti amaldorni shtat saylovlaridagi mag‘lubiyatini bekor qilish uchun yetarlicha ovoz “topishga” chaqirgan.
Tramp suhbat davomida Raffenspergerni urishgan, “xushomad” qilgan, harakat qilishini “o‘tinib so‘ragan” va hatto jinoiy ta’qib qilish bilan mujmal tahdid qilgan. Prezident Raffensperger Fulton okrugida noqonuniy yo‘q qilingan minglab saylov byulletenlarini topmasa (bunga biror dalil yo‘q), davlat kotibi va ofisning bosh yuriskonsulti Ratan Jermani javobgarlikka tortilishini taxmin qilgan.
NBC yozishicha, FQB direktori Kristofer Reyga yo‘llangan xatda demokrat kongressmenlar Tramp tomonidan saylovlarning qalbakilashtirilgani borasidagi dalillar aniq-ravshan ekanligini bildirgan.
Izoh (0)