Bayden Trampni prezident majburiyatlarini bajarishni istamaslikda aybladi

AQShning amaldagi prezidenti Donald Tramp o‘zining davlat rahbari sifatidagi majburiyatlarini bajarishni istamayapti. Bu haqda mamlakatning saylangan prezidenti Jo Bayden Jorjiya shtatida o‘z tarafdorlari qarshisida so‘zlagan nutqida aytib o‘tdi, deb yozadi “RBK”.

Baydenning so‘zlariga ko‘ra, Tramp ma’muriyatining ishlari boshidanoq yurishmagan. “Prezident vaqtini behuda sarflayapti, u muammolarni hal qilish o‘rniga, kuyib-pishadi va noliydi. Tushunmayman, nima uchun u haliyam prezident lavozimiga yopishyapti, axir u prezidentning ishini bajarishni xohlamayapti-ku?” — dedi demokrat.

Jorjiyada 5-yanvar kuni senatga saylovlarning ikkinchi bosqichi bo‘lib o‘tishi kerak, uning yakunlari kongress yuqori palatasini kim nazorat qilishini belgilaydi. Agar ikkala mandatni ham Respublikachilar partiyasidan nomzodlar Devid Perdyu va Kelli Leffler qo‘lga kiritsa, respublikachilar senatda ko‘pchilik o‘rinni saqlab qoladi.

O‘z nutqida Bayden Perdyu va Leffler Jorjiya aholisiga ham, konstitutsiyaga ham emas, amaldagi prezidentga sodiqlikka ont ichganini aytdi. Shu munosabat bilan u demokratlardan nomzodlarni qo‘llab-quvvatlashni so‘radi.

Dekabr oxirida Bayden Amerikaning prezident Tramp rahbarligidagi joriy ma’muriyati yangi keyingi ma’muriyatga ishlarni topshirish jarayonida o‘zini mas’uliyatsiz tutayotganini aytgan edi.

Avvalroq AQShning saylangan vitse-prezidenti Kamala Xarris ketayotgan prezident Donald Trampni hokimiyatni suiiste’mol qilishda ayblagan edi.

“Yozib olingan suhbat haqida hammalaringiz eshitgandirsiz? Bu, albatta, umidsizlikka to‘la ovoz edi… Bu AQSh prezidenti tomonidan hokimiyatning ochiqchasiga va qo‘pol ravishda suiiste’mol qilinishi edi”, — dedi Xarris Jorjiya shtatining Savana shahrida demokrat senatorlarga ovoz berish bo‘yicha tashviqot qilib nutqida.

Gap, go‘yoki, Trampning Jorjiya shtati davlat kotibi bilan suhbati haqida bormoqda, unda Amerika yetakchisi ovozlarning uning foydasiga qayta sanab chiqishni so‘ragan.