Diagnovir qurilmasi so‘lak tahlili orqali 10 soniyada SARS-CoV-2 koronavirusi bilan kasallanganlik tashxisini 99 foiz aniqlikda qo‘yadi. Bu haqda Anqaradagi Bilkent universiteti matbuot xizmatiga tayanib, “RBK” xabar berdi.
“Keng foydalanilayotgan PZR-testlardan farqli o‘laroq, tizim namunalar replikatsiyasiga emas, balki zamonaviy optik usullar yordamida virus bor yoki yo‘qligini aniqlashga asoslangan. Tizimda optik va elektron modullardan foydalanilgan bo‘lib, ular virusning borligini yuqori aniqlikda aniqlaydi… Ushbu tizim mamlakatimiz va butun dunyoda virusni aniqlashning tezkor va ishonchli usuli sifatida keng foydalaniladi deb hisoblaymiz”, — deyiladi xabarda.
Virusni aniqlash texnologiyasi yetti oy davomida yaratilgan bo‘lib, u kelajakda nafaqat SARS-CoV-2 virusini, balki boshqa patogenlarni ham aniqlashga qodir bo‘ladi.
Aniqlash tizimi optik usullarga asoslangan, buning uchun patogenlarni aniqlovchi maxsus chip yaratilgan. Bemordan olingan namuna maxsus eritma bilan aralashtiriladi va hosil bo‘lgan aralashma patogenni aniqlash uchun chipga tomiziladi. Biosensor qurilma virusni aniqlasa, fluoressent rang o‘zgaradi.
Avvalroq AQShdagi Jorj Vashington universiteti tadqiqotchilari mobil telefonlar yordamida koronavirusni aniqlovchi kichik qurilma yaratgani, Eronda koronavirusni yarim daqiqada aniqlovchi nanotest yaratilgani xabar berilgan edi.
Izoh (0)