“Andijondagi “Do‘stlik” chegara postida uyushgan jinoiy guruh aniqlangan”. DBQ vakili “IMEI ishi” haqida

Mobil qurilmalar IMEI kodini ro‘yxatdan o‘tkazish maqsadida fuqarolarning pasport ma’lumotlarini boshqa shaxsning nomiga rasmiylashtirish holati Andijon viloyatidagi “Do‘stlik” chegara postida ham uyushgan jinoiy guruh tomonidan amalga oshirilgan. Bu haqda 4-yanvar kuni O‘zbekiston Telekommunikatsiya tarmoqlarini boshqarish respublika markazida o‘tkazilgan matbuot anjumanida ma’lum qilindi, deya xabar bermoqda “Daryo” muxbiri Mirolim Isajonov.

Davlat bojxona qo‘mitasi bosh inspektori Baxtiyor Kabirovning aytishicha, mazkur masala boshlangan paytda qo‘mita tomonidan call-markaz tashkil etilgan. Shundan so‘ng jabrlangan fuqarolar murojaat qilishni boshlagan.

“Bunday noqonuniy xatti-harakatlar bir yoki ikki nafar shaxsning qo‘lidan kelmaydi, balki uyushgan guruh tomonidan amalga oshiriladi. Davlat bojxona qo‘mitasi tezkor vakillari tomonidan Andijon viloyatidagi “Do‘stlik” chegara postida o‘rganish ishlari olib borilganida uyushgan guruh Qirg‘iziston tomonga o‘tib, u yoqdan har bir pasportni 5 dollardan 20 dollargacha bo‘lgan qiymatda sotib olib, har bitta chegaradan o‘tgan fuqaro nomiga mobil qurilmalarning IMEI kodini ro‘yxatdan o‘tkazayotgan holatlar aniqlangan. Bu bo‘yicha tegishli protsessual hujjatlar rasmiylashtirilgan. Bugungi kunda mazkur holat yuzasidan tergov harakatlari olib borilyapti”, — dedi Baxtiyor Kabirov.