O‘zbekistonlik 28 yoshli ayol Turkiyaning Izmir shahri Karshiyak tumanida joylashgan ko‘p qavatli binoning 10-qavatidan sakrab, vafot etgani to‘g‘risida xabar berilgandi. O‘zbekistonning Istanbul shahridagi Bosh konsulxonasi 2-yanvar kuni O‘zbekiston fuqarosining vafot etgani to‘g‘risida OAVda e’lon qilingan ma’lumotlarni tasdiqladi, deb xabar beradi TIV matbuot xizmati.
Ma’lum qilinishicha, huquqni muhofaza qiluvchi idoralar O‘zbekiston fuqarosining o‘limi bo‘yicha tergov jarayonini boshlagan.
Bosh konsulxona ma’lumotlariga ko‘ra, 2021-yil 1-yanvar kuni Istanbul shahrida 1974-yil 11-iyunda tug‘ilgan yana bir O‘zbekiston fuqarosi yurak yetishmovchiligidan vafot etgan.
“Bosh konsulxona yuqoridagi holatlarni nazoratga olib, Turkiyaning vakolatli idoralari bilan aloqada bo‘lib turibdi. Vafot etganlarning jasadlarini O‘zbekistonga dafn etish uchun yuborishni tashkil qilishda marhumlarning yaqinlariga konsullik va huquqiy yordam ko‘rsatildi”, — deyiladi vazirlik xabarida.
Eslatib o‘tamiz, 2020-yilning dekabr oyida Turkiyada 31 yoshli o‘zbekistonlik tilanchi tomonidan pichoqlab o‘ldirilgani haqida xabar berilgandi. 12-dekabr kuni Turkiyada yana bir o‘zbekistonlik qotillik qurboni bo‘ldi. Istanbulning Chatalja tumanida yuzaga kelgan o‘zaro janjal oqibatida O‘zbekiston fuqarosi, 1986-yilda tug‘ilgan X.X. jarohat olib, vafot etdi.
Izoh (0)