Qashqadaryo viloyatida koronavirusga qarshi kurashgan tez tibbiy yordam bo‘limi maxsus brigadalariga va’da qilingan rag‘bat puli to‘lab berilmayotgani haqida xabar berilgandi. Viloyat Sog‘liqni saqlash boshqarmasi axborot xizmati mazkur maqolaga munosabat bildirib, va’da qilingan rag‘bat pullari tez orada to‘lab berilishini ma’lum qildi.
“Qarshi shahar tez tibbiy yordam bo‘limi maxsus brigadalariga Respublika maxsus komissiyasining 2020-yil 30-apreldagi 20-sonli yig‘ilish bayoni bilan tasdiqlangan vaqtinchalik nizom, Vazirlar Mahkamasining 2020-yil 20-iyuldagi ‘Koronavirus infeksiyasiga qarshi kurash davrida aholini tez tibbiy yordam xizmati bilan keng qamrab olish chora-tadbirlari to‘g‘risida’gi 446-sonli, 2020-yil 30-iyuldagi ‘Koronavirus infeksiyasiga qarshi kurash, aholining sanitariya-epidemiologik osoyishtaligi va salomatligini saqlashga jalb qilingan tez tibbiy yordam xodimlarini qo‘shimcha moddiy rag‘batlantirish to‘g‘risida’gi 458-sonli hamda 2020-yil 24-sentabrdagi ‘O‘zbekiston Respublikasida koronavirus infeksiyasi tarqalishining oldini olish tadbirlariga ajratilayotgan mablag‘larning samaradorligini ta’minlashga oid chora-tadbirlar to‘g‘risida’gi 583-sonli qarorlari asosida tegishli tartibda qo‘shimcha rag‘batlantirish to‘lovlari to‘lanishi belgilangan.
Bu borada Respublika shoshilinch tibbiy yordam ilmiy markazi Qashqadaryo filiali direktorining tegishli buyruqlari qabul qilingan. Shundan 458-sonli qarorda belgilangan rag‘bat to‘lovlari, ya’ni respublika budjetidan ajratilgan 100 milliard so‘m hamda taniqli tadbirkor, vatandoshimiz Alisher Usmonov tomonidan qo‘shimcha ravishda homiylik xayriyasi sifatida ajratilgan 100 milliard so‘m hisobidan Qarshi shahar tez tibbiy yordam bo‘limining mazkur tadbirlarga jalb qilingan xodimlariga ham bir martalik moddiy rag‘batlantirish to‘lovlari o‘z vaqtida to‘lab berilgan”, — deyiladi boshqarma munosabatida.
Boshqarma mas’ullarining aytishicha, boshqa yo‘nalishlardagi rag‘batlantirish to‘lovlariga doir birlamchi hisob-kitob hujjatlari o‘z vaqtida taqdim qilinmaganligi sababli to‘lovlar kechikkan. Ayni paytda mazkur hujjatlarni tezkorlik bilan tayyorlab, moliya idoralariga taqdim etish bo‘yicha zarur chora-tadbirlar belgilangan.
Shuningdek, bu borada sustkashlikka yo‘l qo‘ygan mutasaddilarga tegishli tartibda chora ko‘rilgan. Biroq boshqarma mazkur ishda kim aybdor qilinganini va aynan kimga chora ko‘rilganini ochiqlamagan. Dastlabki maqolada “Daryo” muxbiri bilan suhbatlashgan viloyat Sog‘liqni saqlash boshqarmasi bosh iqtisodchisi Shomurod Boymurodov bunday vaziyat kelib chiqishiga Qarshi shahar tez tibbiy yordam stansiyasi rahbariyati aybdor ekanini, ular o‘z vaqtida rag‘batlantirilishi lozim bo‘lgan xodimlar ro‘yxatini taqdim etmaganini aytgandi. Qarshi shahar tez tibbiy yordam stansiyasi boshlig‘i Ulash Vohidov esa “bizdan endi ro‘yxat so‘rashdi”, degandi.
Boshqarma axborot xizmatining qo‘shimcha qilishicha, bo‘lim haydovchilarining avtomashinalarga ehtiyot qismlari yetishmasligi borasidagi e’tirozlari ham o‘rganilgan.
“Mutasaddilarga topshiriqlar berildi. Viloyat hokimining qarori asosida viloyat sog‘liqni saqlash boshqarmasi maxsus avtokorxonasiga 383 million so‘mlik ehtiyot qismlari keltirilgan. Ayni paytda mazkur ehtiyot qismlarini tarqatish jarayoni davom etmoqda”, — deyiladi boshqarma axborot xizmatining rasmiy javobida.
Izoh (0)