“SSV 2020-yil korrupsiyaga qarshi kurash yili bo‘ladi, degandi. Shu bayonotdan keyin vazirlik bir ish qildimi?” — Saidikrom Ahrorov

O‘zbekiston sog‘liqni saqlash tizimidagi korrupsion holatlarni o‘rganishni tibbiyot muassasalarini litsenziyalashga mas’ul bo‘g‘indan boshlash kerak, deydi “Medinvest” korxonasi rahbari Saidikrom Ahrorov “Daryo” muxbiri Musulmonbek Ibrohimovga bergan intervyusida.

Uning ta’kidlashicha, so‘nggi yillarda “ancha jonlanib qolgan” xususiy tibbiyot sohasida yaxshi ishlayotganlar ham bor, “yomon yo‘ldan ketganlari” ham bor. Xususan, 2018-yili Samarqanddagi xususiy kasalxona noqonuniy tug‘ruqlarni amalga oshirish bilan shug‘ullanib, bola savdosiga aralashgani, sotilmagan chaqaloqlarni hatto yoqib yuborgani ma’lum bo‘lganini eslab o‘tdi.

“Bir necha yil avval Samarqandda xususiy tug‘ruqxona shifokorlariga nisbatan jinoyat ishi ochilgan edi. Shu holat yuzasidan Sog‘liqni saqlash vazirligining litsenziya boshqarmasi boshlig‘i shunday bayonot bilan chiqdi: Biz bu tug‘ruqxonani o‘n marta yopganmiz, lekin u yana o‘n marta qaytadan ochildi. Savol tug‘iladi — kim ochdi, kim ruxsat berdi?”, — deydi Ahrorov. Uning ta’kidlashicha, boshqa bir xususiy klinikada bir oy ichida uchta o‘lim qayd etilgan. Tekshirilsa, klinikaning hujjatlari qalbaki, na direktori va na bosh shifokorida tibbiy bilim bor.

“2020-yil boshida bosh prokuror o‘tkazgan yig‘ilishda sog‘liqni saqlash tizimidagi kamchiliklar, xususan, korrupsion holatlar borligi aytildi. Ertasiga Sog‘liqni saqlash vazirligi 2020-yil vazirlik uchun korrupsiyaga qarshi kurash yili bo‘ladi, deb e’lon qildi. Shu bayonotdan keyin vazirlik bir ish qildimi? Fikrimcha, bu sohadagi korrupsiyaga qarshi kurashni litsenziya boshqarmasidan boshlash kerak. Litsenziya kimlarga, qanday qilib berilyapti, shu savollarga javob topish lozim”, — deya qo‘shimcha qildi Saidikrom Ahrorov.