Мобил қурилмалар IMEI кодини рўйхатдан ўтказиш мақсадида фуқароларнинг паспорт маълумотларини бошқа шахснинг номига расмийлаштириш ҳолати Андижон вилоятидаги «Дўстлик» чегара постида ҳам уюшган жиноий гуруҳ томонидан амалга оширилган. Бу ҳақда 4 январь куни Ўзбекистон Телекоммуникация тармоқларини бошқариш республика марказида ўтказилган матбуот анжуманида маълум қилинди, дея хабар бермоқда «Дарё» мухбири Миролим Исажонов.
Давлат божхона қўмитаси бош инспектори Бахтиёр Кабировнинг айтишича, мазкур масала бошланган пайтда қўмита томонидан call-марказ ташкил этилган. Шундан сўнг жабрланган фуқаролар мурожаат қилишни бошлаган.
«Бундай ноқонуний хатти-ҳаракатлар бир ёки икки нафар шахснинг қўлидан келмайди, балки уюшган гуруҳ томонидан амалга оширилади. Давлат божхона қўмитаси тезкор вакиллари томонидан Андижон вилоятидаги «Дўстлик» чегара постида ўрганиш ишлари олиб борилганида уюшган гуруҳ Қирғизистон томонга ўтиб, у ёқдан ҳар бир паспортни 5 доллардан 20 долларгача бўлган қийматда сотиб олиб, ҳар битта чегарадан ўтган фуқаро номига мобил қурилмаларнинг IMEI кодини рўйхатдан ўтказаётган ҳолатлар аниқланган. Бу бўйича тегишли процессуал ҳужжатлар расмийлаштирилган. Бугунги кунда мазкур ҳолат юзасидан тергов ҳаракатлари олиб бориляпти», — деди Бахтиёр Кабиров.
Мавзуга доир:
- «Жиноий гуруҳ таркибида амалдорлар ҳам, фаррошлар ҳам бор». ИИВ вакили Андижонда IMEI кодларни рўйхатдан ўтказишда кузатилган ноқонуний ҳолат ҳақида
- 2020 йилнинг 11 ойида мобил қурилмалар IMEI кодини рўйхатга олишдан қанча маблағ тушгани маълум қилинди
- Андижонда телефонларнинг IMEI кодларини ўзгалар номига рўйхатдан ўтказиш билан шуғулланган шахсларга жиноят иши қўзғатилди
- Ўзбекистонда телефонларнинг IMEI кодларини бошқа шахслар номига рўйхатдан ўтказиш билан шуғулланган жиноий гуруҳ фош этилди
Изоҳ (0)