O‘zbekistonga 5-yanvar kuni Afg‘oniston Sog‘liqni saqlash vazirligining mas’ul xodimlari va shifokorlaridan iborat delegatsiya tashrif buyurdi, deya xabar qilmoqda Sog‘liqni saqlash vazirligi.
Qayd etilishicha, tashrifdan maqsad — afg‘onistonlik tibbiyot mutaxassislariga koronavirus infeksiyasining profilaktikasi, tarqalishining oldini olish, uning diagnostikasi va davolash bo‘yicha O‘zbekiston tajribasini o‘rgatish, COVID-19’ni davolashda zamonaviy va samarali usullarni qo‘llash bo‘yicha ularning amaliy ko‘nikmalarini va malakasini oshirishdan iborat.
20 nafar afg‘onistonlik mutaxassisdan iborat delegatsiya O‘zbekistonda o‘n kun davomida bo‘lib, maxsus o‘quv mashg‘ulotlarida ishtirok etadi. Ushbu mashg‘ulotlar koronavirus infeksiyasini davolash jarayonida bevosita qatnashgan professional mutaxassislar tomonidan ishlab chiqilgan.
O‘quv dasturini tayyorlashda Tibbiyot xodimlarining kasbiy malakasini rivojlantirish markazi hamda respublika ixtisoslashtirilgan ilmiy-amaliy tibbiyot markazlari, ilmiy-tekshirish institutlari yetakchi xodimlari qatnashgan.
Jumladan, shoshilinch tibbiy yordam, ftiziatriya, pulmonologiya, gematologiya, terapiya, tibbiy reabilitatsiya, akusherlik, ginekologiya, pediatriya, xirurgiya, ko‘z mikroxirurgiyasi, endokrinologiya, virusologiya kabi qator sohalar bo‘yicha tibbiyot markazlari hamda ilmiy-tekshirish institutlarining yetakchi mutaxassislari tomonidan koronavirus infeksiyasini davolash va uning asoratlarining o‘ziga xos jihatlari inobatga olingan.
Shuningdek, o‘quv mashg‘ulotlari davomida Zangiota tumanidagi 1 va 2-son yuqumli kasalliklar shifoxonalarida mahorat darslari tashkil qilinadi. Bundan tashqari, mehmonlar ko‘p tarmoqli markaziy poliklinika va oilaviy poliklinikalardagi hamkasblarining faoliyati bilan ham tanishadi. Afg‘onistonlik mutaxassislar Samarqand viloyatiga borishi ham ko‘zda tutilgan.
Ma’lumot uchun, JSST ma’lumotlariga ko‘ra, Afg‘onistonda 52 909 holatda koronavirus infeksiyasi bilan kasallanish qayd etilgan bo‘lib, shundan o‘lim ko‘rsatkichi 2 230 nafarni tashkil qilmoqda. So‘nggi sutka davomida 200 nafar kishida yangi kasallanish holatlari aniqlangan.
Avvalroq O‘zbekiston Tojikistonning janubida COVID-19 bilan kasallanganlarni qabul qilish markazini qurishi, O‘zbekiston ko‘magi bilan Qirg‘izistonda yana ikkita shifoxona qurilgani hamda Hindistonning NephroPlus kompaniyasi O‘zbekistonda to‘rtta dializ klinikasi qurishi haqida xabar berilgandi.
Izoh (0)