Demokrat Nensi Pelosi vakillar palatasi spikeri etib qayta saylandi. Yig‘ilish AQSh Kongressi quyi palatasining saytida translyatsiya qilingan.
Pelosining tayinlanishi uchun vakillar palatasining 216 nafar a’zosi ovoz bergan. Uning respublikachi raqibi Kevin Makkarti esa 209 ta ovoz to‘plagan.
80 yoshli Pelosi AQSh vakillar palatasini boshqargan birinchi va yagona ayol hisoblanadi. U 2007—2011-yillarda, shuningdek, 2019-yildan buyon palata spikeri lavozimida ishlab kelmoqda.
So‘nggi yillarda Pelosi AQShning amaldagi prezidenti Donald Trampga faol qarshilik ko‘rsatgan. Xususan, 2019-yilning sentabrida u davlat rahbariga nisbatan impichment jarayoni boshlanganini e’lon qilgandi. Biroq AQSh Senati Trampni oqlagan edi.
Shundan so‘ng Tramp Kongressda “Mamlakatdagi holat to‘g‘risida”gi har yilgi chiqishi davomida Pelosining qo‘lini siqishdan bosh tortgan. Mamlakat rahbari o‘z chiqishini yakunlagach, auditoriya qarsak chalishga tushgan vaqtda Pelosi Trampning nutqi yozilgan varaqlarni yirtib tashlagan edi.
3-noyabr kuni AQShda vakillar palatasi qayta saylangan. Demokratlar 222 o‘rin bilan AQSh Kongressining quyi patalasida ko‘pchilikni saqlab qolgan.
Izoh (0)