Демократ Нэнси Пелоси вакиллар палатаси спикери этиб қайта сайланди. Йиғилиш АҚШ Конгресси қуйи палатасининг сайтида трансляция қилинган.
Пелосининг тайинланиши учун вакиллар палатасининг 216 нафар аъзоси овоз берган. Унинг республикачи рақиби Кевин Маккарти эса 209 та овоз тўплаган.
80 ёшли Пелоси АҚШ вакиллар палатасини бошқарган биринчи ва ягона аёл ҳисобланади. У 2007—2011 йилларда, шунингдек, 2019 йилдан буён палата спикери лавозимида ишлаб келмоқда.
Сўнгги йилларда Пелоси АҚШнинг амалдаги президенти Дональд Трампга фаол қаршилик кўрсатган. Хусусан, 2019 йилнинг сентябрида у давлат раҳбарига нисбатан импичмент жараёни бошланганини эълон қилганди. Бироқ АҚШ Сенати Трампни оқлаган эди.
Шундан сўнг Трамп Конгрессда «Мамлакатдаги ҳолат тўғрисида»ги ҳар йилги чиқиши давомида Пелосининг қўлини сиқишдан бош тортган. Мамлакат раҳбари ўз чиқишини якунлагач, аудитория қарсак чалишга тушган вақтда Пелоси Трампнинг нутқи ёзилган варақларни йиртиб ташлаган эди.
3 ноябрь куни АҚШда вакиллар палатаси қайта сайланган. Демократлар 222 ўрин билан АҚШ Конгрессининг қуйи паталасида кўпчиликни сақлаб қолган.
Изоҳ (0)