The Washington Post gazetasi Donald Tramp va Jorjiya davlat kotibi Bred Raffensperger o‘rtasidagi suhbat audiosini e’lon qildi. Unda AQShning amaldagi prezidenti amaldorni shtat saylovlaridagi mag‘lubiyatini bekor qilish uchun yetarlicha ovoz “topishga” chaqirgan, deb yozadi TJournal.
Tramp suhbat davomida Raffenspergerni urishgan, “xushomad” qilgan, harakat qilishini “o‘tinib so‘ragan” va hatto jinoiy ta’qib qilish bilan mujmal tahdid qilgan. Prezident Raffensperger Fulton okrugida noqonuniy yo‘q qilingan minglab saylov byulletenlarini topmasa (bunga biror dalil yo‘q), davlat kotibi va ofisning bosh yuriskonsulti Ratan Jermani javobgarlikka tortilishini taxmin qilgan.
WP ushbu tahdidni “mujmal” deb atagan. “Jorjiya xalqi g‘azabda, mamlakatdagi insonlar g‘azablanmoqda. Bilsangiz, qaytadan sanaganingiz haqida aytishning hech qanday yomon tomoni yo‘q”, — degan u.
“Qarang, men qilmoqchi bo‘lgan narsa faqat shu. Men 11 780 ta ovozni topishni xohlayman, bu bizda mavjud ovozdan bittaga ko‘p. Chunki biz shtatda yutdik”, — deydi Donald Tramp.
Raffensperger va Jermani Trampning shtatdagi g‘alabasi borasidagi da’volarini rad etib, u buzilgan fitna nazariyasiga tayanayotganini tushuntirgan. Ularning ta’kidlashicha, saylangan prezident Jo Baydenning g‘alabasi adolatli va aniq bo‘lgan, biroq Tramp ularning barcha dalillarini rad etgan.
Suhbat davomida aloqada Trampning bir nechta ittifoqdoshi, xususan, Oq uy administratsiyasi rahbari Mark Medouz va konservativ yurist Kleta Mitchell ham bo‘lgan. Ushbu yozuv paydo bo‘lganidan so‘ng Mitchell Raffenspergerning ofisi “so‘nggi ikki oyda noto‘g‘ri bo‘lgan ko‘plab bayonotlarni bildirganini” aytgan. Uning so‘zlariga ko‘ra, saylovlarda ishtirok etgan barcha Jorjiya bo‘yicha ma’lumotlar tasdiqlanishini talab qilmoqda. Qolganlar vaziyatga izoh berishni istamagan.
Ma’lumot uchun, 2021-yil 20-yanvar kuni saylangan davlat rahbari demokrat Jo Bayden o‘z lavozimiga kirishishi kerak. Dekabr o‘rtalarida saylovchilar hay’ati Trampning saylovdagi bosh raqibini Amerikaning 46-prezidenti deb e’lon qildi. Bayden saylovchilar hay’ati a’zolarining 300 dan ortiq ovozini, amaldagi prezident esa 230 dan ziyodroq ovozni qo‘lga kiritdi. Baydenning inauguratsiyasi an’anaga ko‘ra Vashingtonda bo‘lib o‘tadi.
Izoh (0)