Dunyo bo‘yicha koronavirusga chalinganlar soni bir oy ichida 20 million nafarga ko‘payib, 85 million kishiga yetdi. Barcha kasallanish holatlarining yarmidan ko‘pi besh davlat – AQSh, Hindiston, Braziliya, Rossiya va Fransiya hissasiga to‘g‘ri keladi, deya xabar bermoqda “RBK”.
Jons Hopkins universiteti ma’lumotlariga ko‘ra, dunyo bo‘yicha koronavirus infeksiyasini yuqtirib olish bilan bog‘liq holatlar soni 85 milliondan oshdi. 1,8 million kishi kasallik qurboniga aylangan. Oy davomida 20 million nafar yangi bemor qayd etilgan: 4 dekabr kuni COVID-19 ga chalinganlar umumiy soni 65 million nafar edi.
Kasallik eng ko‘p qayd etilgan davlatlar beshligidan quyidagilar o‘rin olgan:
- AQSh — 20,6 million kishi;
- Hindiston — 10,3 million;
- Braziliya — 7,7 million;
- Rossiya — 3,2 million;
- Fransiya — 2,7 million.
Ma’lumot uchun, 2-yanvar holatiga ko‘ra, O‘zbekistonda 77 231 kishida (jumladan, 2-yanvarning o‘zida 49 kishida) koronavirus aniqlangan. Rasmiy statistikaga ko‘ra, kasallik oqibatida 614 kishi vafot etgan (“Daryo” tomonidan 2020-yil 22-sentabrga qadar yuritilgan statistika ma’lumotlariga ko‘ra, qurbonlar soni kamida 633 nafar). Bemorlarning 98 foizi yoki 75 358 nafari sog‘aygan. Ayni vaqtda, O‘zbekiston rasmiylari koronavirusga chalinganlar soni haqiqatda rasmiy statistikadagidan bir necha barobar ko‘p bo‘lishi mumkinligini inkor etmaydi.
Jahon sog‘liqni saqlash tashkiloti (JSST) rahbari Tedros Gebreyesus 2021-yilda dunyo mamlakatlari koronavirusning yangi varianti kabi yangi sinovlarga duch kelishini ma’lum qilgan edi. Kasallikning shunday yangi varianti dekabr oyi o‘rtalarida Buyuk Britaniyada aniqlandi. Mamlakat bosh vaziri Boris Jonsonning so‘zlariga ko‘ra, bu shtamm odatdagisidan 70 foizga yuqumliroq.
Ayni vaqtda, JSST vakillarining ta’kidlashicha, virusning ushbu genetik varianti kasallik kechishining og‘ir-yengilligiga ta’sir qilmaydi. Koronavirusning yangi shtammi Buyuk Britaniyadan tashqari boshqa mamlakatlarda ham, xususan, Daniya, Italiya, Avstraliya, Xitoy, Turkiya va AQShda ham aniqlangan. O‘zbekistonda hozircha ushbu shtamm aniqlangani yo‘q.
Izoh (0)