AQShda koronavirus bilan bog‘liq vaziyatga doir ma’lumotlar haddan tashqari bo‘rttirilgan, bunga kasallanganlar va vafot etganlar sonini hisoblash bo‘yicha Kasalliklarning oldini olish va nazorat qilish markazi (CDC) qo‘llayotgan usul sababchi, dedi AQSh prezidenti Donald Tramp. U bu haqda Twitter’dagi sahifasida yozib qoldirgan.
“AQShda Xitoy virusi bilan kasallanish holatlari soni boshqa, aksariyati kasallanish holatlari miqdorini qasddan kamaytirib ko‘rsatadigan yoki noaniq ma’lumot beradigan davlatlarniki bilan ham taqqoslaganda kulgili bo‘lgan usul sabab haddan tashqari bo‘rttirilgan. ‘Agar qandaydir shubhangiz bo‘lsa, unda buni COVID deb atayvering’. Feyk xabarlar!”, — deb yozgan prezident.
CDC ma’lumotlariga ko‘ra, AQShda pandemiya boshidan beri COVID-19 ni yuqtirib olish bilan bog‘liq 20 millionta holat qayd etilgan, shundan 346,9 ming kishi vafot etgan. Ayni vaqtda, Jons Hopkins universiteti ma’lumotlariga ko‘ra, mamlakatda kasallanganlar soni 20,4 millionga yetgan, 350,2 ming kishi vafot etgan.
AQShning bosh infeksionisti Entoni Fauchi Trampning so‘zlariga munosabat bildirib, kasallanish holatlari va o‘limlar soni haqqoniy ekanini ta’kidlagan. “Kasalxonalarga boring. Tibbiyot xodimlari qanday baloga to‘qnash kelganini ko‘ring. Bu haqiqat. Feyk emas”, — dedi Fauchi.
Kasalliklarning oldini olish va nazorat qilish markazi tomonidan oktabr oyida e’lon qilingan maqolada koronavirus oqibatidagi o‘lim holatlari soni aslida rasmiy statistikadagidan ko‘proq bo‘lishi mumkinligi ta’kidlangan edi. Bunda gap koronavirusni simptomsiz kechirgan yoki pandemiya bilan bog‘liq boshqa sabablar oqibatida vafot etganlar haqida bormoqda.
AQShda ayni vaqtda aholini koronavirusga qarshi emlash (vaksinatsiya) kampaniyasi davom etmoqda. 4 milliondan ortiq amerikalik Moderna yoki Pfizer/BioNTech kompaniyalarining vaksinasi bilan emlangan. Mamlakatdagi emlash shoxobchalariga jami 13 million doza dori tarqatilgan.
Izoh (0)