Kim Chen In KXDR fuqarolarini Yangi yil bilan an’anaviy bayram murojaati o‘rniga xat bilan tabrikladi. Bu haqda Koreya Markaziy telegraf agentligi tomonidan tarqatilgan xabarnomada so‘z boradi.
KXDR yetakchisi hatto “og‘ir yillarda ham” Koreya Mehnat partiyasiga ishonch bildirib, uni qo‘llab-quvvatlab turganliklari uchun mamlakat fuqarolariga minnatdorchilik bildirgan.
Chin ko‘ngildan mamlakatimizning barcha oilalariga katta baxt, sevimli xalqimizga farovonlikni tilab qolaman. Yangi yilda xalqimiz orzu va umidlari ro‘yobga chiqadigan yangi davr tezroq kirib kelishi uchun yanada jonkuyarlik bilan kurash olib boraman.Og‘ir yillarda ham o‘zining shubhasiz ishonchi bilan partiyamizni bardavom qo‘llab-quvvatlab turgan qalblarga minnatdorchilik bildiraman. Buyuk xalqimizga behad sadoqat bilan jon-dil bilan xizmat qilishga yana bir bor qasam ichaman.
Kim Chen In, KXDR yetakchisi
Kim Chen In 2011-yildan beri birinchi marta shimoliy koreyaliklarni bunday xat bilan tabriklamoqda. Xat Koreya Mehnat partiyasining yaqin kunlar ichida bo‘lib o‘tishi kutilayotgan sakkizinchi qurultoyi arafasida e’lon qilindi. Qurultoyda mamlakat maqsadlari belgilab beriladi.
Koreya Markaziy telegraf agentlining qo‘shimcha qilishicha, Kim Chen In Yangi yil munosabati bilan Pxenyandagi maqbarada bo‘lib, o‘z bobosi va otasining xotirasiga hurmat bajo keltirgan. Unga Koreya Mehnat partiyasi Markaziy qo‘mitasining boshqaruv organi a’zolari hamrohlik qilgan.
2020-yil aprelidan boshlab, u salkam ikki hafta omma oldida ko‘rinish bermagach, OAV va ijtimoiy tarmoqlarda KXDR yetakchisi og‘ir kasallikka chalingani yoki vafot etgan bo‘lishi mumkinligi haqida xabarlar tarqalgan edi. 2020-yil oktabrida u Mehnat partiyasiga asos solinganiga 75 yil to‘lishi munosabati bilan o‘tkazilgan harbiy paradda xalqqa murojaat yo‘llagan edi.
Izoh (0)