Uxandagi birinchi koronavirus to‘lqinining ko‘lami rasman qayd etilganidan to‘qqiz marta kattaroq bo‘lishi mumkin. Bu haqda Xitoy kasalliklar nazorati va profilaktikasi markazi tomonidan aholining seropozitivlik bo‘yicha o‘tkazilgan tadqiqoti guvohlik bermoqda, deb yozadi “Korrespondent.net”.
Aprel o‘rtalarida Uxanning Xubey provinsiyasida, shuningdek, Pekin, Shanxay va yana to‘rtta boshqa provinsiyada yashovchi 34 ming kishidan qon namunalari olingan. Shularning uchdan bir qismi Uxan hissasiga to‘g‘ri kelgan.
Ayni paytda Uxanning 11 million aholisining 4,43 foizida koronavirusga nisbatan antitanalar aniqlangan, bu taxminan 450 ming kishi demakdir. Aprel o‘rtalarida shaharda rasman COVID-19 tasdiqlangan odamlar soni 50 008 kishini tashkil etgan.
Bunday tafovutlar epidemiya boshidagi tartibsizliklar va uning ilk bosqichidagi test olish bo‘yicha cheklangan imkoniyatlar oqibatidir. Shuningdek, 4,43 foiz ko‘rsatkichi namunalarni yig‘ish hududlar bo‘yicha bir tekisda bo‘lmagani (kasallanish holatlari ko‘p bo‘lgan hududdan yoki keksalar orasidan olingani) sababli ham haqiqatdan sal uzoqroq bo‘lishi ham mumkin.
Bu shuni bildiradiki, sayyorada infeksiyaning birinchi o‘chog‘iga aylangan shahar xuddi butun mamlakat kabi jamoaviy immunitetdan uzoqdir.
Avvalroq Xitoy COVID-19’ga sabab bo‘ladigan virusning kelib chiqishiga doir tadqiqotlarni davlat siriga aylantirgani haqida xabar berilgan edi. Xitoy rahbariyati COVID-19’ni keltirib chiqaradigan SARS-CoV-2 virusining kelib chiqishi bo‘yicha tadqiqotlarni qattiq nazorat qilmoqda.
Mavzuga doir:
- Xitoyda koronavirusning kelib chiqishi bo‘yicha davlat siri hisoblangan tadqiqotlar o‘tkazildi
- Xitoyda jurnalist ayol Uxandan reportajlar tayyorlagani uchun 4 yilga qamaldi. U pandemiya mavzusida yolg‘on xabar tarqatganlikda ayblandi
- Xitoyda bir kishida COVID-19 aniqlangani sababli butun shahar karantinga yopildi
Izoh (0)