Xitoyning Sinopharm kompaniyasi tomonidan ishlab chiqilgan koronavirusga qarshi vaksina 79,34 foiz samaradorlik ko‘rsatdi. “Kommersant”ning xabar berishicha, natija klinik sinov tadqiqotlarning oraliq uchinchi tahlil ma’lumotiga asoslangan.
“Pekinning Sinopharm CNBG tomonidan ishlab chiqarilgan inaktivatsiyalangan koronavirus vaksinasi emlashdan keyin xavfsizligini ko‘rsatdi... Vaksinaning СOVID-19’ga qarshi himoya ta’siri 79,34 foizni tashkil qiladi”, — degan Sinopharm’ning sho‘ba korxonasi bo‘lgan Pekin Biologik mahsulotlar instituti.
Avvalroq COVID-19’ga qarshi Xitoy vaksinasi xorijiy davlat — BAA tomonidan birinchi marta ma’qullangandi. Ushbu davlat rasmiylari klinik sinovlarning uchinchi bosqichini dastlabki natijalaridan mamnun ekanliklarini bildirgan.
Ayni paytda Xitoyning to‘rtta vaksinasi klinik sinovlarning uchinchi bosqichida. Ularning ikkitasini Sinopharm korporatsiyasi, yana birini CanSinoBIO, to‘rtinchisini esa Sinovac kompaniyasi ishlab chiqmoqda.
Jons Hopkins universiteti ma’lumotlariga ko‘ra, dunyoda 82 million kishi koronavirusga chalingani qayd etilgan. Ulardan 1,79 million nafari vafot etgan, 46,3 million nafari sog‘aygan.
Izoh (0)