Suriyada yo‘lovchi avtobusiga uyushtirilgan hujum oqibatida 30 nafar tinch aholi vakillari halok bo‘ldi, yana 15 nafari jabrlandi. Bu haqda SANA davlat axborot agentligiga tayanib, “RBK” xabar bermoqda.
Avtobusga 30-dekabr kuni Toshkent vaqti bilan 19:00 atrofida Kabajeb aholi punkti yaqinida Dayr-az-Zor—Palmira trassasida hujum qilingan.
Suriya inson huquqlari nazorati markazi ma’lumotlariga ko‘ra, jabrlanganlarning bir qismi og‘ir ahvolda. IShID pistirmasiga askarlarni Yangi yil bayramlariga olib ketayotgan uchta avtobus tushgan, deyiladi markaz xabarida.
Shuningdek, ta’kidlanishicha, avtomobillarda elita bo‘linmasi — Suriya prezidenti Bashar Asadning ukasi Mohir Asadning to‘rtinchi mexanizatsiyalashtirilgan diviziyasi askarlari bo‘lgan.
Avvalroq OAVlar Suriyaning Damashq shahri hududi o‘qqa tutilgani haqida xabar bergan edi. SANA ma’lumotlariga ko‘ra, bir nechta jabrlanuvchilar bor. Agentlikning qayd etishicha, o‘qqa tutishni Isroil amalga oshirgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)