Yaponiyaning Yahoo auksionida 1973-yilda ishlab chiqarilgan Nissan Skyline GT-R 35 million iyena (338 ming dollar) qiymatida sotuvga qo‘yildi. Mashinaning bu qadar qimmatligi ushbu modeldan dunyo bo‘ylab 200 ga yaqin nusxa yaratilgani bilan izohlanmoqda, deb xabar beradi Motor.
Nissan Skyline GT-R’ning ikkinchi avlodi 1972-yilning sentabrida paydo bo‘lgan. Biroq keyingi yilning bahoriga borib iqtisodiy inqiroz sabab sportkarlarni ishlab chiqarish to‘xtatilgan. Yarim yil davomida konveyerdan Amerika maslkarlari uslubidagi modeldan 197 nusxa yaratilgan. Qizil Skyline GT-R’dan esa sakkiz dona ishlab chiqarilgan. 1973-yilda Nissan qariyb 15 yil davomida GT-R lineykasini ishlab chiqarishni to‘xtatib qo‘ygan.
Sportkarga 162 ot kuchiga ega 2,0 litrli V6 dvigatel o‘rnatilgan. Kupedagi agregat besh pog‘onali mexanik uzatmalar qutisi yordamida boshqariladi. Skyline GT-R soatiga 100 kilometr tezlikka 8,8 soniyada erishadi. Maksimal tezligi — 190 km/soat.
Sotuvga qo‘yilgan “Skaylayn” achinarli ahvolda. E’lon qilingan suratlarga ko‘ra, sportkar garajlarning birida turli buyumlar ostida saqlanmoqda. Skyline GT-R kuzovi qalin chang qatlami va korroziya izlari bilan qoplangan. Shuningdek, sportkarning saloni va kapot osti qismi ham jiddiy restavratsiyaga muhtoj.
Sotuvchining so‘zlariga ko‘ra, 47 yillik Skyline GT-R hozirga qadar 50 ming kilometrgina yo‘l bosgan bo‘lib, u 35 million iyenaga baholanmoqda. Bu pulga yangi Rolls-Royce Wraith xarid qilsa bo‘ladi.
Avvalroq Yaponiyada dunyodagi eng qimmat Nissan Skyline auksion orqali 313 ming dollarga sotilgani to‘g‘risida xabar berilgandi.
Izoh (0)