Япониянинг Yahoo аукционида 1973 йилда ишлаб чиқарилган Nissan Skyline GT-R 35 миллион иена (338 минг доллар) қийматида сотувга қўйилди. Машинанинг бу қадар қимматлиги ушбу моделдан дунё бўйлаб 200 га яқин нусха яратилгани билан изоҳланмоқда, деб хабар беради Motor.
Nissan Skyline GT-R’нинг иккинчи авлоди 1972 йилнинг сентябрида пайдо бўлган. Бироқ кейинги йилнинг баҳорига бориб иқтисодий инқироз сабаб спорткарларни ишлаб чиқариш тўхтатилган. Ярим йил давомида конвеердан Америка маслкарлари услубидаги моделдан 197 нусха яратилган. Қизил Skyline GT-R’дан эса саккиз дона ишлаб чиқарилган. 1973 йилда Nissan қарийб 15 йил давомида GT-R линейкасини ишлаб чиқаришни тўхтатиб қўйган.
Спорткарга 162 от кучига эга 2,0 литрли V6 двигатель ўрнатилган. Купедаги агрегат беш поғонали механик узатмалар қутиси ёрдамида бошқарилади. Skyline GT-R соатига 100 километр тезликка 8,8 сонияда эришади. Максимал тезлиги — 190 км/соат.
Сотувга қўйилган «Скайлайн» ачинарли аҳволда. Эълон қилинган суратларга кўра, спорткар гаражларнинг бирида турли буюмлар остида сақланмоқда. Skyline GT-R кузови қалин чанг қатлами ва коррозия излари билан қопланган. Шунингдек, спорткарнинг салони ва капот ости қисми ҳам жиддий реставрацияга муҳтож.
Сотувчининг сўзларига кўра, 47 йиллик Skyline GT-R ҳозирга қадар 50 минг километргина йўл босган бўлиб, у 35 миллион иенага баҳоланмоқда. Бу пулга янги Rolls-Royce Wraith харид қилса бўлади.
Аввалроқ Японияда дунёдаги энг қиммат Nissan Skyline аукцион орқали 313 минг долларга сотилгани тўғрисида хабар берилганди.
Изоҳ (0)