O‘zbekiston tovar-xomashyo birjasida 14—20-dekabr kunlari o‘tkazilgan savdolarda Ai-80 markali benzin narxi biroz tushdi, deya xabar qilmoqda birja axborot xizmati.
Qayd etilishicha, birja savdolariga 23 952 tonna Ai-80 markali avtomobil benzini qo‘yilgan va ulardan 21 736,1 tonnasi, ya’ni 90,7 foizi sotilgan. O‘tkazilgan savdolarda har kuni o‘rtacha 47 xaridor ishtirok etgan.
Ko‘rib chiqilayotgan davrda Ai-80 markali avtomobil benzinining o‘rtacha kunlik narxi mahsulotning bir tonnasi uchun 5845,8 ming so‘mdan 5 727,9 ming so‘mgacha yoki 2 foizga pasaydi.
Shuningdek, ushbu davrda Ai-80 rusumli avtomobil benzinining o‘rtacha haftalik kotirovkasi 5787,5 ming so‘mni, Ai-91 markali benzinniki esa 6759,4 ming so‘mni tashkil etdi.
Avvalroq Energetika vazirligi O‘zbekistonda benzin narxlari bilan nima sodir bo‘layotganiga tushuntirish bergandi.
Eslatib o‘tamiz, 2020-yilning 1-mayidan boshlab xo‘jalik yurituvchi subyektlar, jumladan, AYoQShlar benzinni birja savdolari orqali sotib olmoqda, benzin narxlari turli avtomobillarga yoqilg‘i quyish shoxobchalarida farq qilishi mumkin, chunki bu u har bir AYoQSh tomonidan qanchaga sotib olinganiga bog‘liq.
Ma’lumot uchun, 7–14-dekabr kuni o‘tkazilgan birja savdolarida Ai-80 markali avtomobil benzinining o‘rtacha boshlang‘ich narxi 2,6 foizga ko‘tarilgandi.
Izoh (0)