Tolyattidagi skverga “AvtoVAZ”ning 50 yilligi munosabati bilan “Kopeyka” modeliga yodgorlik o‘rnatildi. Birinchi “VAZ-2101”ning nusxasini Lada History klubining ishqibozlari vandallardan himoyalash maqsadida shaffof kub ichiga joylashtirgan, deb xabar beradi Motor.
Yodgorlik uchun ilk “Kopeyka”ning aniq nusxasi tayyorlanib “dengiz to‘lqini” rangiga bo‘yalgan. Installyatsiya mualliflari “VAZ-2101”ning 1970-yil 19-aprelda konveyrdan chiqayotgan vaqtini tasvirlashga uringan: uning ustiga mashinani liniya bo‘ylab harakatlanishini ta’minlovchi “krab” o‘rnatilgan. Avtomobilning o‘zi 50 yil oldin zavodda foydalanilgan Sobiq Ittifoq davriga va Italiya avtomobilsozlik kompaniyasiga tegishli original ehtiyot qismlardan foydalanilgan.
Yodgorlikning ochilishiga bag‘ishlangan marosimda Tolyatti shahri meri Sergey Antashyev ham ishtirok etgan. U yaqin orada yodgorlikka birinchi “Kopeyka”ni yig‘ishda ishtirok etgan zavod ishchilarining ismi yozilgan peshlavha ham ilinishiga va’da bergan. “AvtoVAZ”ning 50 yilligiga bag‘ishlangan skver 2020-yilda qurib bitkazilgan va o‘tgan yozda foydalanishga topshirilgan.
Ma’lumot uchun, Rossiyada “VAZ-2101” modellarini ishlab chiqarish 1970-yilda boshlangan va 1988-yilga qadar davom etgan. 18 yil davomida Tolyattidagi zavod 4,85 million nusxa “Jiguli” ishlab chiqarishga muvaffaq bo‘lgan. “Kopeyka” nomini esa avtomobil 1990-yillar oxirida, model nomerining oxiridagi bir raqami sabab olgan.
Izoh (0)