АҚШнинг камида учта штати россиялик хакерлар томонидан киберҳужумга учраган, бунинг натижасида АҚШнинг бир нечта федерал идоралари жабрланган. Бу ҳақда Bloomberg агентлиги текширувнинг боришидан хабардор бўлган манбаларига таяниб хабар берди, деб ёзади Meduza. Гап қайси штатлар ҳақида бораётганига аниқлик киритилмади.
АҚШ киберхавфсизлик агентлиги 17 декабрь куни маълум қилишича, хакерлар ўз ҳужумини мураккаб ҳамда чуқур билимни талаб этувчи схема бўйича амалга оширган. Агентлик маълумотларига кўра, хакерлар ҳужум учун SolarWinds платформасидан, шунингдек, бошқа кириш нуқталаридан фойдаланган, уларни идорада ошкор қилишмади.
АҚШнинг сайланган президенти Жо Байден шу куниёқ хакерлик ҳужуми потенциал равишда «минглаб қурбонларга, шу жумладан, Америка компаниялари ва давлат федерал органларига» дахл қилган бўлиши мумкинлигини айтди. Байденнинг таъкидлашича, киберхавфсизлик унинг маъмурияти олдидаги бирламчи вазифалардан бирига айланади.
Аввалроқ The Washington Post газетаси киберҳужум ортида Россия махсус хизматлари билан боғлашадиган Cozy Bear (АPТ29 сифатида ҳам таниқли) гуруҳи турганини хабар қилганди. Хусусан, Пентагон, Давлат департаменти, Молия вазирлиги ва савдо вазирлиги ҳужум нишони бўлган.
Изоҳ (0)