AQSh administratsiyasi zudlik bilan Moderna tomonidan ishlab chiqarilgan koronavirusga qarshi vaksinani tarqatishni boshlaydi. Bu haqda AQSh prezidenti Donald Tramp 18-dekabr kuni ma’lum qildi, deya xabar qilmoqda “Interfaks”.
“Moderna vaksinasi ko‘pchilik tomonidan ma’qullandi. Tarqatish darhol boshlanadi”, – deb yozdi Tramp Twitter’da.
“Yevropa va butun dunyoga Xitoy virusi (koronavirusni nazarda tutmoqda – tah.) katta zarba berdi. Xususan, Germaniya, Fransiya, Ispaniya va Italiyaga. Vaksinalar yo‘lga chiqdi!” – deya qo‘shimcha qildi AQSh prezidenti.
Avvalroq AQSh Oziq-ovqat va farmatsevtika idorasi (FDA) mutaxassislari guruhi Moderna vaksinasidan favqulodda foydalanishga ruxsat berishni tavsiya qilgandi.
Bloomberg xabar qilishicha, 20 nafar mutaxassis vaksinani yoqlab chiqishdi, bittasi betaraf qoldi. Hech kim qarshi ovoz bermadi.
Vaksina ikki dozadan iborat. Ikkinchi doza birinchisidan 28 kun o‘tgach qabul qilinadi. Vaksinani, taxminan, -20 daraja haroratda saqlash kerak. Bunday sharoitda u olti oygacha saqlanishi mumkin.
Moderna vaksinasi Qo‘shma Shtatlarning shimoli-sharqidagi ishlab chiqarish korxonalaridan Irving, Texas shtatidagi tarqatish markaziga, so‘ngra kasalxona va dorixonalarga yetkazilishi kutilmoqda.
Eslatib o‘tamiz, AQShda koronavirusga qarshi emlash rasman 14-dekabr kuni boshlandi. Kasalliklar nazorati va profilaktikasi markazlari (CDC) ma’lumotlariga ko‘ra, 2020-yil oxirigacha Amerika hukumati 40 million kishini emlashni rejalashtirmoqda.
1-dekabr kuni Moderna AQSh Oziq-ovqat mahsulotlari va dori vositalarining Sanitar nazorati boshqarmasiga (FDA) koronavirus vaksinasidan favqulodda foydalanish uchun ariza yuborganini e’lon qilgandi. Avvalroq uning samaradorligi dastlabki tahlilda 94,1 foiz, kasallikning og‘ir shaklida esa 100 foiz samaradorlik ko‘rsatgani ma’lum qilingandi.
Izoh (0)