Belarus hukumati mamlakatdan avtomobilda chiqib ketadiganlar uchun yig‘im joriy qilmoqchi

Belarus moliya vaziri mamlakatdan avtomobilda chiqqanlik uchun yig‘im joriy qilish taklifini kiritdi, deb yozadi Meduza.

Belarusning “Belta” agentligi moliya vaziri Yuriy Seliverstovga tayanib ma’lum qilishicha, rejaga ko‘ra, yig‘imni viloyat hukumatlari joriy qila oladi. Maksimal og‘irligi besh tonnadan oshmaydigan transport vositalarida mamlakatdan chiqib ketayotganlar bu to‘lovni to‘laydi.

Yig‘im miqdori uchta tayanch qiymatdan oshmaydi. Bir tayanch qiymatning 2021-yildagi miqdori 29 Belarus rubli (11,55 dollar)ga teng bo‘ladi.

“Tut.by” qayd etishicha, Belarusdan Rossiyaga yig‘im to‘lamasdan ketish mumkin bo‘ladi.

Agar bunday yig‘im ma’qullansa, to‘plangan mablag‘lar o‘tkazish punktini dezinfeksiya qilish, zarur narsalar bilan ta’minlashga yo‘naltiriladi.

Belarusdan avtomobilda chiqib ketganlik uchun yig‘im Soliq kodeksiga o‘zgartirishlar kiritish to‘g‘risidagi qonun loyihasida ko‘zda tutilgan. 18-dekabr kuni u Belarus parlamentining quyi palatasi — Vakillar palatasi tomonidan qabul qilindi. Endi hujjat imzolash uchun Aleksandr Lukashenkoga yuborildi.

20-dekabrdan Belarus fuqarolariga va ushbu mamlakatda istiqomat guvohnomasiga ega chet elliklarga mamlakatdan quruqlikdagi chegaralar orqali chiqib ketish taqiqlandi (Rossiya bilan chegaradan tashqari). Koronavirus pandemiyasi bunga rasmiy sabab sifatida keltirildi. Quruqlikdagi chegaralar orqali Belarusga kirish esa 30-oktabrdan man etilgan edi.