“Toshkent shahar suv ta’minoti” MChJda 18-dekabr kuni bo‘lib o‘tgan matbuot anjumanida poytaxt aholisining ichimlik suvi ta’minoti va kanalizatsiya xizmatlari uchun narxlarni oshirish bo‘yicha xalq deputatlari Toshkent shahar kengashi qarori loyihasi bo‘yicha izoh berildi. Bu haqda “Kun.uz” xabar berdi.
Qayd etilishicha, suv ishlab chiqarish tannarxi amaldagi narx bilan mutanosib emas.
“Bugungi kunda korxona tomonidan 1 kub metr suv ishlab chiqarish uchun 372 so‘m sarflanmoqda. Ko‘rinib turibdiki, tannarxning o‘zi aholi uchun hisoblangan 1 kub metr ichimlik suvi narxidan (310 so‘m) 62 so‘mga qimmat.
Shu kabi omillar sabab ‘Toshkent shahar suv ta’minoti’ MChJ 2019-yilda 58,8 milliard so‘m hamda 2020-yilning 8 oyida 21,3 milliard so‘m zarar ko‘rdi”, — dedi “Toshkent shahar suv ta’minoti” MChJ direktori Maqsud Abbosxonov.
Ta’kidlanishicha, tizim va tarmoqlarning eskirganligi tufayli suv ta’minotida uzilishlarning oldini olish, ichimlik suvi va kanalizatsiya xizmatlarining sifatini oshirish bo‘yicha 2021-yilga rejalashtirilgan tadbirlarni inobatga olgan holda yangi tariflar bo‘yicha takliflar tayyorlangan.
“Toshkent shahar suv ta’minoti” MChJ direktorining iqtisodiy masalalar bo‘yicha o‘rinbosari Ilhom Tolipov taklif etilayotgan yangi narxlar evaziga 2021-yilda quyidagi ishlar amalga oshirilishini ma’lum qildi.
Nasos stansiyalardagi suv uzatish tizimini avtomatlashtirish (SCADA) hisobiga va eskirgan nasoslarni yangi zamonaviy energotejamkor nasoslarga almashtirish. Buning natijasida suv ishlab chiqarish hajmi 17,6 million kub metrga kamaytiriladi va yiliga 6 million kilovatt elektr energiyasi tejaladi;
Har yili eskirgan ichimlik suvi va kanalizatsiya quvurlari 69 kilometrdan ta’mirlanadi. Ma’lum qilinishicha, hozirda Toshkent shahridagi suv quvurlarini ta’mirlash juda orqada qolgan. Shu sababli yiliga 69 kilometrdan ta’mirlash evaziga taxminan 8 yil muddatda bu boradagi normaga tushib olinadi. Hozirda imkoniyatdan kelib chiqib yiliga 15-20 kilometr uzunlikdagi quvurlar ta’mirlanmoqda.
Jamiyat asosiy ishchi xodimlarining o‘rtacha oyligi 1-1,2 million so‘mni tashkil qilmoqda. Yangi tariflar tasdiqlansa, xodimlarning o‘rtacha oyliklari 1,8 million so‘mga yetkaziladi. Ma’lum qilinishicha, jamiyat rahbarlarining o‘rtacha oyligi 3-3,5 million so‘m va ularning oyligini oshirish ko‘zda tutilmagan.
Shuningdek, yangi tariflar jamiyatning xalqaro moliya institutlari oldidagi qarzlarini o‘z vaqtida qaytarish imkonini beradi. Hozirda Islom taraqqiyot bankidan 24 million dollar miqdorida qarzdorlik qolgan, jadvalga asosan, yiliga 3 million dollar qaytarilmoqda. Shuningdek, “Toshkent shahar suv ta’minoti” MChJ Yevropa tiklanish va taraqqiyot bankidan 30 million dollar miqdoridagi kreditni olmagani ma’lum qilindi. Bu boradagi muzokaralar pandemiya boshlanganida to‘xtatib qo‘yilgan.
“Boshqa kommunal xizmatlar narxi barcha hududlar uchun bir xil miqdorda, ichimlik suvi esa o‘sha hududning suv yetkazib berishdagi geografik joylashuvi, unga ketadigan sarf-xarajatlardan kelib chiqib belgilanadi. Toshkent shahri suv narxi eng arzon bo‘lgan hududlardan hisoblanadi. Poytaxtdagi iste’molchilar uchun markazlashgan ichimlik suvining 1 litri narxi amaldagi 31 tiyin o‘rniga 50 tiyinga oshishi kutilmoqda”, — deya ma’lum qilgan “Toshkent shahar suv ta’minoti” MChJ direktori.
Eslatib o‘tamiz, Toshkent shahar hokimligi “Toshkent shahrida ichimlik suv ta’minoti va oqova suv xizmatlari uchun tartibga solinadigan narxlarni belgilash chora-tadbirlari to‘g‘risida”gi qaror loyihasi bilan “Toshkent shahar suv ta’minoti” MChJning hozirgi kunda amalda bo‘lgan tarifini oshirishni taklif etmoqda.
Izoh (0)