Bosh vazir o‘rinbosari, Turizmni rivojlantirish davlat qo‘mitasi rahbari Aziz Abduhakimov “Daryo” muxbiri Mirolim Isajonovga bergan qisqacha intervyusida Tangemning O‘zbekistonga qachon kelishi kutilayotganiga oid savolga javob qaytardi.
Eslatib o‘tamiz, O‘zbekistonning Koreyadagi turistik brend elchisi, mashhur “Saroy javohiri” teleserialidagi Tangem roli ijrochisi Li Yon E 2020-yilning iyun oyida o‘zbek xalqiga videomurojaat yo‘llagan edi. U o‘z murojaati davomida tezroq O‘zbekistonga kelib, muxlislari bilan uchrashishni intiqib kutayotganini bildirgan edi.
Aziz Abduhakimovning ma’lum qilishicha, aktrisaning Toshkentga tashrifi pandemiyadan oldin rejalashtirilgan edi.
“Ammo Koreyada ham, bizda ham qat’iy karantin qoidalari amalga oshirilgach, uning kelishi qoldirildi. Biroq Li Yon E biz bilan hozirgacha hamkorlikda ishlayapti, elchilik faoliyatini faol ravishda davom ettirmoqda” – dedi bosh vazir o‘rinbosari.
Tangemning karantin vaqtida o‘zbekistonlik muxlislariga yuborgan bir qancha videomurojaatlarini OAV va ijtimoiy tarmoqlar orqali yurtdoshlarimizga havola etilgan.
“Aktrisaning ham karyerasi va shaxsiy hayoti bor, mamlakatimizga qachon kelishi uning grafigiga bog‘liq. Lekin u doimo respublikamizga kelishni istaydi, bu fikrlarni onlayn muloqotlarimizda ham ta’kidlaydi. Biz O‘zbekistonning chet el davlatlaridagi turizm elchilariga yilda kamida bir marta Toshkentga reklama maqsadida kelishiga sharoit yaratib beramiz. Ular tashriflaridan so‘ng ijtimoiy tarmoqlardagi sahifalariga sayohati davomidagi suratlar va roliklarni joylashadi, ommaviy axborot vositalari orqali turli promo-aksiyalar uyushtirishadi”, – dedi Aziz Abduhakimov.
Ma'lumot uchun, 2020-yilning aprel oyida Li Yon E O‘zbekiston xalqiga o‘zi bosh rolni ijro etgan “Saimdan rang-barang xotiralar” nomli teleserialini hadya qilgan. Aktrisa ushbu serial ayni damda aksariyat vaqtini uyda o‘tkazayotgan O‘zbekiston aholisiga vaqtni mazmunli o‘tkazishiga yordam beradi, deya umid bildirgan edi.
Izoh (0)