Ummonning Maskat shahrida bo‘lib o‘tadigan Osiyo Olimpiya kengashining (OOK) navbatdagi Bosh assambleyasi boshlanishidan bir kun avval, an’anaga ko‘ra 74-ijroiya qo‘mitasi yig‘ilishi bo‘lib o‘tdi. Unda tashkilot rahbariyatining yangi tarkibi va ijroiya qo‘mitasiga a’zolar saylandi.
OOK Konstitutsiyasida (qoidalarni qo‘llash, 71 va 76-moddalariga asosan) 5 yirik kompleks musobaqalarga mezbon mamlakat OOK vitse-prezidenti lavozimiga nomzod ko‘rsatish huquqiga ega bo‘lishi qayd etilgan.
O‘zbekiston 2025-yil IV yoshlar Osiyo o‘yinlarini qabul qilishi evaziga birinchi marta o‘z vakilini tashkilot rahbariyatiga nomzod sifatida taklif etish imkoniga ega bo‘ldi.
Avvalroq O‘zbekiston Milliy olimpiya qo‘mitasi (MOQ) ijroqo‘mining 10-dekabr kungi yig‘ilishida Otabek Umarov nomzodi OOK vitse-prezidentligiga ilgari surilgandi.
15-dekabr kuni bo‘lib o‘tgan OOK ijroqo‘mi yig‘ilishida Otabek Umarov nomzodi bir ovozdan ma’qullandi. Shu tariqa Otabek Umarov tashkilot vitse-prezidenti etib rasman saylandi.
“Avvalambor, menga bildirilgan yuksak ishonch uchun barchaga o‘z minnatdorchiligimni bildirib qolaman. Bunday nufuzli tashkilotda mamlakatimiz manfaatlarini himoya qilish, qit’ada olimpiya harakatini rivojlantirishga hissa qo‘shish men uchun sharaf. Toshkentda o‘tadigan 2025-yilgi yoshlar Osiyo o‘yinlarini o‘tkazish yangi O‘zbekiston uchun jahon hamjamiyati oldidagi jiddiy sinovlardan biri. Muhtaram Prezidentimiz va hukumatimizning qo‘llab-quvvatlashi bilan ushbu musobaqani yuqori saviyada tashkil qilishga bor kuch va g‘ayratimizni ishga solamiz”, — dedi Otabek Umarov.
16-dekabr kuni Maskatda OOKning bosh Assambleyasi yig‘ilishi bo‘lib o‘tadi. Unda Otabek Umarov rasman OOK vitse-prezidenti sifatida ishtirok etadi. Assambleya doirasida OOK va O‘zbekiston tomoni o‘rtasida 2025-yil yoshlar Osiyo o‘yinlarini Toshkentda o‘tkazish bo‘yicha shartnoma imzolash marosimi bo‘lib o‘tadi.
Ma’lumot uchun, Otabek Umarov O‘zbekiston Prezidenti Shavkat Mirziyoyevning kenja kuyovi hisoblanadi. U 2019-yilning 7-martida O‘zbekiston Triatlon federatsiyasiga rais bo‘lgandi. 2019-yil 8-noyabrida esa yangi tashkil etilgan O‘zbekiston MMA assotsiatsiyasi prezidentiga aylangandi. Shuningdek, 2020-yil 9-fevralida uning yangi tuzilgan O‘rta Osiyo MMA konfederatsiyasi rahbariga aylangani haqida xabar berilgandi. Umarov 2020-yilning avgust oyida Triatlon federatsiyasi raisligi va MMA assotsiatsiyasi prezidentligidan ketgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)