Уммоннинг Маскат шаҳрида бўлиб ўтадиган Осиё Олимпия кенгашининг (ООК) навбатдаги Бош ассамблеяси бошланишидан бир кун аввал, анъанага кўра 74-ижроия қўмитаси йиғилиши бўлиб ўтди. Унда ташкилот раҳбариятининг янги таркиби ва ижроия қўмитасига аъзолар сайланди.
ООК Конституциясида (қоидаларни қўллаш, 71 ва 76-моддаларига асосан) 5 йирик комплекс мусобақаларга мезбон мамлакат ООК вице-президенти лавозимига номзод кўрсатиш ҳуқуқига эга бўлиши қайд этилган.
Ўзбекистон 2025 йил IV ёшлар Осиё ўйинларини қабул қилиши эвазига биринчи марта ўз вакилини ташкилот раҳбариятига номзод сифатида таклиф этиш имконига эга бўлди.
Аввалроқ Ўзбекистон Миллий олимпия қўмитаси (МОҚ) ижроқўмининг 10 декабрь кунги йиғилишида Отабек Умаров номзоди ООК вице-президентлигига илгари сурилганди.
15 декабрь куни бўлиб ўтган ООК ижроқўми йиғилишида Отабек Умаров номзоди бир овоздан маъқулланди. Шу тариқа Отабек Умаров ташкилот вице-президенти этиб расман сайланди.
«Авваламбор, менга билдирилган юксак ишонч учун барчага ўз миннатдорчилигимни билдириб қоламан. Бундай нуфузли ташкилотда мамлакатимиз манфаатларини ҳимоя қилиш, қитъада олимпия ҳаракатини ривожлантиришга ҳисса қўшиш мен учун шараф. Тошкентда ўтадиган 2025 йилги ёшлар Осиё ўйинларини ўтказиш янги Ўзбекистон учун жаҳон ҳамжамияти олдидаги жиддий синовлардан бири. Муҳтарам Президентимиз ва ҳукуматимизнинг қўллаб-қувватлаши билан ушбу мусобақани юқори савияда ташкил қилишга бор куч ва ғайратимизни ишга соламиз», — деди Отабек Умаров.
16 декабрь куни Маскатда ООКнинг бош Ассамблеяси йиғилиши бўлиб ўтади. Унда Отабек Умаров расман ООК вице-президенти сифатида иштирок этади. Ассамблея доирасида ООК ва Ўзбекистон томони ўртасида 2025 йил ёшлар Осиё ўйинларини Тошкентда ўтказиш бўйича шартнома имзолаш маросими бўлиб ўтади.
Маълумот учун, Отабек Умаров Ўзбекистон Президенти Шавкат Мирзиёевнинг кенжа куёви ҳисобланади. У 2019 йилнинг 7 мартида Ўзбекистон Триатлон федерациясига раис бўлганди. 2019 йил 8 ноябрида эса янги ташкил этилган Ўзбекистон MMA ассоциацияси президентига айланганди. Шунингдек, 2020 йил 9 февралида унинг янги тузилган Ўрта Осиё MMA конфедерацияси раҳбарига айлангани ҳақида хабар берилганди. Умаров 2020 йилнинг август ойида Триатлон федерацияси раислиги ва MMA ассоциацияси президентлигидан кетганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)